智取大市 - 晉佳 2019年7月12日
【智取大市】樓市跌浪之缺口 - 晉佳
拉加德10月好大機會出任歐央行行長，到時好大機會實施寬鬆貨幣政策。 資料圖片 適中字型 較大字型
拉加德10月好大機會出任歐央行行長，到時好大機會實施寬鬆貨幣政策。美國呢一刻仲想壓低債息，再加埋歐元區跟風，表面睇起上嚟，係中美歐一齊寬鬆嘅劇本。
中美歐齊寬鬆喺08海嘯後，並非首見，但今次唔同嘅係，包括股樓債在內嘅資產估值，以回報率計，應該比十年內任何一段寬鬆時期都要高，短期趨勢似乎仲會更貴。簡單例子係領展（823）同港鐵（066），股息率3厘唔夠，股價繼續強勢，回報增長又未必追得上，似乎優質高息股不足3厘回報會逐漸成為新常態。
科技改變生產鏈，令生產成本升幅受控，同時減低原材料、能源倚賴度，令寬鬆時期冇高通脹，銀紙繼續印，資產價格不斷攀升。即使美國減息壓低融資成本，但同時股樓上升令回報率不斷萎縮，未來係咪能夠再壓低利息，令透過融資持有資產賺息差嘅投資策略有利可圖？唔敢講呢個因素比通脹更重要，至起碼資產價格會成為政策嘅重要決定因素。
資產回報同融資成本之間嘅息差收窄，長此下去令資產價格失去承接力，因為冇回報就冇人借錢買，會成為資產市場轉捩點。減息甚至零息嘅效果，某程度上係推遲資產市場轉捩點嘅出現，喺經濟放緩下，逼不得已使出呢招支持資產價格，亦反映資產市場大升浪，即將見到盡頭了。
晉佳
http://fb.com/advanceguy1
本欄逢周一、三、五刊出
智取大市 - 晉佳 舊文
來源 source: http://hk.finance.appledaily.com
