冰說聰明 - 青冰 2019年8月1日
【冰說聰明】百事入股五谷的後著 - 青冰
五谷磨房去年12月上市，上市前入股的基金，已過了禁售期，呢幾日回得急，相信是基金沽貨尾所致。 資料圖片 適中字型 較大字型
上周百事宣佈入股25%五谷磨房（1837）股權，五谷當天上午曾漲三成，不過呢幾日回吐，星期二更去到百事入股價1.80元附近，究竟百事有乜後著呢？
五谷磨房主打天然無添加的健康食品，按上市文件所載，2017年係全國第二大天然食品公司，市佔率係1.7%。係，因為這個市場分得散，頭五名加埋都只係7.6%，但論品牌知名度算係極高，毛利率更加嚇死人，高達76%！至於百事，當然唔係只有可樂，旗下有三條產品線，當中有一條近年最積極併購的，就是健康食品，當中最出名嘅品牌是桂格麥片。相比起用32億美元收購有氣礦泉水Sodastream，入股五谷磨房只用咗1.3億美元，完全唔起眼。上文所指的市佔率五大，百事就是其一，換言之，今次的合作，兩間公司加埋已經躍升為龍頭大哥。
有超強合作夥伴，盈利能力又高，點解會連跌幾日呀？咁就要從股權架構分析。五谷磨房去年12月上市，至今七個月，上市前入股的基金，已過了禁售期，當中幾個基金共持有4億幾股，約兩成股權，雖然公司已經過咗上市後禁發新股之期限，但今次引百事入股，並沒選擇發新股，反而是百事將大部份基金的持貨收歸，再向管理層之一楊卓亞收購8.9%股份，即係百事在沒有攤薄股東的權益下，收購了25%股權，大股東則有42%，楊卓亞仍持有8%，三位加埋共有75%，而青冰計過，基金們的貨尾，還有約6,000萬股，呢幾日回得咁急，相信是沽貨尾所致。
私募基金賽富盡沽股權後，其合夥人在今星期已辭去非執董之職，下一步董事局的重組，應是百事派員入局，新上市公司規定在首12個月不能易手，相信百事都係等緊這個限期屆滿吧。
青冰
http://fb.com/chingbing888
本欄逢周四刊出
冰說聰明 - 青冰 舊文
來源 source: http://hk.finance.appledaily.com
