操盤手札記 - 割柑人 2019年8月20日
【操盤手劄記】中國Plan B怎執行 - 割柑人
中央表示支持深圳建設「中國特色社會主義先行示範區」，深圳概念噚日股炒起，但估計炒風唔長久。資料圖片 適中字型 較大字型
剛過去嘅周日，超過170萬人冒雨上街示威，激發到咁多人出嚟，早前少女被射爆眼球、國泰（293）高層「被辭職」係導火線。距離十一國慶只剩不足個半月，據講林鄭要喺呢日之前收拾好個爛攤子。政府急忙派糖，但唔回應訴求，咁點可能收科？
講返國泰，上周五，央視喺下晝4時48分，率先披露國泰CEO何杲同佢deputies之一嘅CCO盧家培辭職；到5時14分，港交所「披露易」先見國泰通告。點解央視報道可以快過國泰通告？國泰人事變動，係主動定被動？有人一早知道，有無牽涉內幕交易？監管機構必須徹查！
香港回歸22年，香港人心卻未回歸。面對咁嘅窘局，中國啟動Plan B。前日，中共中央同國務院表示，支持深圳建設「中國特色社會主義先行示範區」，話有利於實施「粵港澳大灣區戰略」、豐富「一國兩制」新實踐。此時此舉，政治味道大於經濟。
睇份文件，改革力度好大！值得注意嘅有兩點，係第一次提出：一、「擴大人民有序政治參與」；二、「在推進人民幣國際化上先行先試，探索創新跨境金融監管」，之前只係上海。一副以深圳取代香港格局，不過，執行係最大問題！大陸好多政策都寫得好好，但都執行唔到。香港最大嘅優勢係制度優勢，擁有法治制度、資本賬開放、銀行體系穩定，而且較少受大陸政策影響。深圳可唔可以取代香港？借鑑前海，有排搞囉！
受消息刺激，噚日深圳概念股炒起，帶動大市氣氛，港股挾淡倉升2.2%，收26291。恒指展開回補裂口之旅，初步目標係8月5日裂口（由26868跌至26502）。深圳概念股會炒一輪，但唔長久；反而，區內具優勢嘅平保（2318）可以留意。
割柑人
本欄逢周二刊出
操盤手札記 - 割柑人 舊文
來源 source: http://hk.finance.appledaily.com
