智取大市 - 晉佳 2019年9月6日
【智取大市】撤回不能主宰港股 - 晉佳
內銀股之中，招行最似樣，買招行的好處係，係食到升浪又算穩陣。
資料圖片 適中字型 較大字型
當好多香港人將眼球放曬喺政局，的確好難抽身去睇，其實港股呢個市場，係咪完全俾眼前嘅亂局左右？升千點好似係因為挾淡倉、林鄭撤回，但話100%因為呢個因素就太睇得起自己影響力，與此同時係有李克強提及適時運用降準工具、美滙急回同埋中美10月初重啟談判等等因素。要做港股投資者，一方面要掌握國情，同時要好似個外國人咁冷眼旁觀成件事。如果將眼前自己最關心嘅事無限放大，始終會阻礙自己做出正確決定。做人要有人性，但投資就真係要冇人性，因為你嘅對手係冇人性可言。
早前講到，睇250天線嘅超長線指標，A股有機會進入新一輪中線上升周期。市場目前反映中美貿易戰亂局，但未認真反映收完關稅，遲早會向國內減稅振興經濟嘅一步。利用AI加快研發藥品，成為藥股未來業績催化劑之一，而AI、大數據、5G，一步步擴大使用範圍，成為整體經濟動力。
唔講咁遠了，A股重返上升周期嘅話，券商、內銀係緊貼A股嘅板塊，爭在跑贏定跑輸，券商最狼死係中信建投（6066），年初炒得起，幾個月後A股回升的話，應該有佢份；至於內銀，最似樣點都係招行（3968），買招行的好處係，係食到升浪又算穩陣。
晉佳
http://fb.com/advanceguy1
本欄逢周一、三、五刊出
智取大市 - 晉佳 舊文
來源 source: http://hk.finance.appledaily.com
