智取大市 - 晉佳 2019年12月16日
【智取大市】好醫生最大障礙 - 晉佳
平安好醫生股價要上升，真係要佢嘅股東唔再減持先得。資料圖片 適中字型 較大字型
中美首階段協議如預期般冇將原定12月15日加徵嘅關稅落實，但將9月落實嘅1,200億美元中國貨關稅減半至7.5%，係呢輪中美貿易戰裏面首次減關稅，象徵意義較大。
由於12月15日唔加稅嘅因素或多或少反映喺市場上，減關稅消息傳出就刺激恒指上周五升近700點。不過大家都知，關稅減得其實都可以加得返，美國唔再出招亦冇人會信，並非真正雨過天晴，恒指繼續維持喺無寧日嘅日子，繼續視明年2月美國總統初選係更影響港股的關鍵因素。因此，對於周期股暫時未投以中線持有嘅信任，博佢回調先考慮入場，點都好過追入。
呢一刻寧向非周期股入手。平安好醫生（1833）之前兩次股價去到60蚊左右，就出現股東配股打擊，一次係上市前投資者出貨，一次係高層減持，令到股價表現明顯冇眾安在線（6060）咁好。平安好醫生個競爭對手阿里健康（241）喺近兩個月緩緩上升，令到平安好醫生估值相對阿里健康折讓達到四成！睇嚟，阻住平安好醫生股價上升嘅因素，就係升到60蚊會唔會再有股東配股，劇本似乎簡單。適逢貿易協議消息已見曬光，資金上周四、五一時三刻湧進周期股，人多擠逼下，估計資金快將回流新經濟股，對平安好醫生亦有利，當然，真係要佢嘅股東唔再減持先得。
晉佳
http://fb.com/advanceguy1
本欄逢周一、三、五刊出
智取大市 - 晉佳 舊文
來源 source: http://hk.entertainment.appledaily.com
