冰說聰明 - 青冰 2019年12月19日
【冰說聰明】泰昇派完錢等賣盤? - 青冰
泰昇集團網頁。 適中字型 較大字型
上個月提及的東方海外（316），一如所料豪派特別息12.48元，今日正式除淨，中遠海控（1919）及一眾友好人士必定笑逐顏開，都係嘅，年尾有錢袋，有邊個唔開心吖，但戰友又唔好以為這是強國專利，今天要講的泰昇集團（687），大股東是外國勢力黑石集團，同樣係袋袋平安。
黑石2013年收購泰昇，成為大股東，不過2016年就轉手賣畀海航旗下公司，戰友都知海航近年咩事啦，結果去年先將幾塊啟德地皮賣咗，今年3月更將泰昇控股權賣返畀黑石。
要詳細講來龍去脈，真係幾千字都講不完，今次集中講回歸黑石後的事吧。黑石3月時以每股3蚊收購海航的持股，按例提全購，泰昇的情況跟東方海外一樣，全購令大股東收凸了貨，最後持有84.35%，低於公眾持股要求，要停牌諗諗計，之後當然搵到獨立第三方接貨啦，黑石最終持股75%，約25.2億股。全購及註銷未行使認股權，動用了88.95億元，最後批股收返11.4億元，換言之，收購成本就是70億元。
泰昇在6月宣佈派1.48元的特別息，接著8月派中期息0.21元，10月再宣佈派0.52元特別息，而上星期再話派0.5元特別息，並將於12月27日除淨，先後四次派息，共2.71元，以黑石持股25.2億股計，已經收返68億元，心水清的戰友即刻計到，收購成本變為2億元了。
黑石爽，當日接批股的獨立人士一樣爽皮，根據港交所權益披露，南豐集團在5月申報，持有2.86億股泰昇，四次派息後每股袋了2.71元，即係話每股成本變為0.29元啦。至於黑石點解同南豐咁friend呢，關鍵位就是梁錦松，這位黑石香港前主席，現在是南豐主席，南豐借殼上市，耐唔耐就會有傳聞，不過一直未成事，泰昇派錢後完成歷史任務，下一步是否將個殼傳畀南豐，戰友下年真係要睇實喇。
青冰
http://fb.com/chingbing888
本欄逢周四刊出
冰說聰明 - 青冰 舊文
來源 source: http://hk.entertainment.appledaily.com
