【大茶飯】北水就是愛W股（青冰）
【大茶飯】北水就是愛W股（青冰）
上周一及周二，北水連續兩天錄得較大的淨流入，兩市分別共有51億元及59億元淨流入，即時令市場覺得欣喜，難道將有好消息出來，預先掃貨？
青冰耳聞目睹過，不少投資者對這個「大數據」甚為看重，當作後市的利好指標，但翻查記錄，
北水上次淨流出是5月初，換言之這半年本港局勢無論幾動盪，北水都係持續買入的，只是銀碼多與少，背後的原因，戰友可自行解讀。
大數據無疑係較容易入口，雖然表面看對後市指示性不大，但只要將大數據稍為拆開，仍然會找到有用的東西。相信大家都留意到，港股通於十月尾先將兩隻Ｗ股加入，而北水在開閘之後，似乎都十分喜愛，就以美團(3690)為例，由10月28日開始，每天都是淨流入，直至12月9日先斷纜，連買30個交易日，不過以股價升幅計，這段時間只升了一成左右，相比起今年累漲1.3倍，這一成不算甚麼啦。
另一邊廂的小米(1810)，風頭自然被美團完全蓋過，今年仍然累跌20%，真係羞家，雖然業務及投資界印象，都遠較美團遜色，但北水都係咁買的，由10月28日至今，每天都是錄得淨流入，這數據青冰搵完睇完都覺得驚訝，完全睇漏眼，不過明顯地，踏入12月後，北水買美團係收歛咗，反而買小米就變得更大手。
今年美團認真威盡，小米雖然年尾有反彈，但真係嚴重跑輸大市，來年會否強弱互換，青冰都唔敢太早下定論，不過恆指公司在明年首季會對W股加入恆指作諮詢，相信要落實，最快也會是8月或11月的季檢，距今仍是漫漫長路，一個因素並不足以支持炒到下半年呀，最靠譜的仍然是看業績。美團的業務毫無疑問已脫離谷底，亦已連賺兩季，但五千幾億的市值，未來一定要繼續交強勁增長，才可維持高估值。而小米相對係low tech低估值，習慣被市場睇低一線，所以要勝預期並不困難，最難的反而係，如何說服市場自己值得享有高估值，青冰自問對小米的產品唔熟悉，不敢班門弄斧，戰友如果跟得貼的，請到青冰專頁留言指教一下啦。
Fb個人專頁http://www.fb.com/chingbing888
大茶飯 - 青冰 舊文
來源 source: http://hk.finance.yahoo.com
