大棋局 - Mr. Tregunter 2019年12月17日
【大棋局】美國藉貿戰揭中國數簿 - Mr. Tregunter
中國為應對貿戰衝擊，國進民退，信用系統，極盡監控之能事，只為防對社會之掌控力度下降。資料圖片 適中字型 較大字型
中美貿易談判達成第一階段協議，執筆時仍未有細節，但同坊間預期一樣，第一階段協議只係錢能解決之事。至於結構性改革，原則上承諾改革，實際上點做任佢兜。美國要求中國之結構性改革，強迫技術轉移部份有得傾，取消補貼、國企改革唔會有得傾，牽涉兩大問題。
其一即過去提及，中國之國家資本主義，其實係現代的封企食祿，一方國企就係一方諸侯。掌控經濟也就是掌控人民，國企掌控經濟，黨掌控國企。外力要求打開中國市場，會衝擊當下中共這種統治模式。為應對衝擊，國進民退，信用系統，極盡監控之能事，只為防對社會之掌控力度下降。改革涉及劃位，萊特希澤用強硬派與改革派之委婉講法帶過。所以下一階段傾國企改革，只會緣木求魚。
其二，中國如果全面開放，等於畀美國揭你數簿。內地所有賬目，從來都係枱面枱底兩條數。當中究竟有幾多爛賬，隨時連共產黨自己都講唔清。在中國經濟相對封閉時，所有嘢到最後由中央出面枱底拆掂佢，或債轉股，或爛賬轉移去另一間公司，夾硬嚟就可以。如果全面開放，賬目上爭拗要經法律枱面上公開處理，最嚴重情況係可以引爆金融危機。好似08年金融海嘯，CDS個窿究竟有幾大？初期一個講法係20萬億（美元，下同），另一講法係60萬億。金融講個信字，失信條數點計，好多時講唔清，講唔清就會有恐慌。
萊特希澤指，中國同意未來兩年增購2,000億元美國商品和服務，當中包括320億元農產品。2017年中國買美國農產品240億元，未來兩年多買320億元，一年160億元。所以每年買400億元美國農產品，其實只係中方最初提出4、500億元之下限。萊特希澤指的2,000億元屬增購，即係話中國以每年1,000億元買兩年緩衝期，再諗計，兩年後點到時再算。
近年中國對全球貿易順差，每年約3,000至4,000億元。往後兩年每年要畀多美國1,000億元，其實就係特朗普初期要求減低美中貿易逆差條數，兩年後隨時再加碼。此1,000億元大部份會從他國貿易上加減彌補，唔夠先從其他地方籌旗。
匹夫無罪，懷璧其罪。唐伯虎入寧王朱宸濠府後發現條友唔對路，但入得呢個堂口唔係你話走就走，最後靠扮癲方能脫身。賢能有識者謙退，小人有識者亦卸，那餘下大機會由小人無識者上。香港往後幾年也難捱。
Mr. Tregunter
本欄逢周二刊出
大棋局 - Mr. Tregunter 舊文
來源 source: http://hk.entertainment.appledaily.com
