港股由1月底突然因武漢肺炎疫情而大跌，正當大家覺得世界末日之際，以為A股開市必然熔
斷，重演2016年的翻版，結果當日便是港股短線見底之時。
明明坊間出現恐慌，中國近乎停市，股市反而節節上升。股市嘅價格反映，果然如一少撮人所言，武漢肺炎仲流過流感。
中國近乎停市，香港零售旅遊飲食都叫救命，點解股市會同廁紙口罩一樣，喺度發「國難財」？背後原因，就係數據主導。本報「投資導航」做過統計，單月大跌超過今年一月的6.6%水平，過去十年出現過13次，往後不同長度的時空，拉平均都係上升，意思即係，每次極恐慌大跌，多數都係走錯鬼。
一跌再跌嘅例子唔係冇，2015年試過、2011年試過、再早啲2008年更加由年頭跌到年尾，但係拉返其他數字去計算，總係會升嘅較多。
過去表現不反映未來，係所有免責聲明嘅第一句話，不過，港股係一個長達十年的大型橫行市，同美股非常唔同，美股不斷創新高，港股一直橫行，價格某程度反映冇乜點進步過，歷史比較重複發生，過去嘅統計表現，準過其他市場。而且同一單新聞可以有好淡解讀，信書不如無書，純睇數據，撇除雜音，可能準過自己估。
現時反彈透支緊疫情完結，到完結時，好消息已成定局，到時新聞又會憂慮停完市點收科、保六、長命債點還。一旦憧憬呢啲問題解決到，又會再彈過，周而復始。咁信咗數據，又會有咩結論呢？結論係：呢輪港股反彈浪已經完結。如果有細心睇當日報道，大跌一個月後，平均只係升2.09%；大跌一年後，平均升10.83%。今次大跌後半個月，港股已反彈最多6.23%，半個月嘅時間，已經反彈超過過去全年一半嘅升幅。現時衝入去睇好，肯定沒有國難財，只有國難。
高明
http://fb.com/bigricetea
本欄逢周一刊出
笑到最後 - 高明 舊文
來源 source: http://hk.entertainment.appledaily.com
