武漢肺炎對經濟的打擊，還未可以量化，但肯定係大鑊嘢，近期亦陸續有上市公司披露對營運的打擊，全球科技龍頭
蘋果，亦在周一話，由於內地工廠復工進度緩慢及需求大降，本季的營收目標將會miss，加上美國想要切斷對華為的晶片供應，令本港手機及晶片產業股在周二全線下瀉。
究竟疫情對公司有幾大影響，管理層必然了解，決定何時對市場披露，亦睇得出管理手法之高低。國內飲食業在春節停業，海底撈（6862）在港股長假後開市前，已發通告交代。而上月上市，想成為海底撈2.0的九毛九（9922），要去到首個交易日收市後，才有通告。雖然兩份通告都只是寥寥幾句，但睇得出海底撈除了翻枱率高外，管理層辦事都超有效率。
內地交通部宣佈實施全國免收公路通行費，在2月17日零時生效，新創建（659）有公路業務，就在開市前發通告提醒投資者這個新措施。而另一隻青冰留意開的公路股越秀交通（1052），就在收市後的晚上七點幾，才有通告。如果你係股東又冇跟貼新聞，真係未必知點解當日會跌4%，不過佢都唔係最差喇，另外幾隻公路股，現時都未有通告啊。
遲到好過冇到，近日有唔少公司發通告講自己大鑊，反而有助股價見底，最誇張嘅例子應該係卡森（496），本身有兩大業務，家具業務及物業發展，做廠部份自然大鑊啦，而物業及旅遊發展的區域，主要在海南，亦深受影響，不過一直都由得市場估估嚇，由2月高位3.45元，跌至上周低位1.13元，兩星期累跌近七成，情人節收市後終於有通告講嚇業務的情況，本周一就借勢怒彈43%。股市最忌不明朗，你越唔披露，市場估估嚇就仲跌得甘，管理層們，快快招供吧。
青冰
http://fb.com/chingbing888
本欄逢周四刊出
冰說聰明 - 青冰 舊文
來源 source: http://hk.entertainment.appledaily.com
