疫情下的港樓
很多人關心疫情時期港樓和大陸樓會否大跌，跌幾多，會否有好嘢執，幾時才是買入時機等問題，今明兩篇文章試圖分析一下各種可能性。
香港普遍樓價自六月反送中起計，大約跌了7%，中原領先指數由188.95跌至農曆年前的175.88，現在雖然久不久會見到報紙大字標題某屋苑「肺炎確診
價」389呎600萬，但都只屬譁眾取寵居多，其實睇返市況，該樓盤市價大約520萬，如用家有心買，我認為最少嗌到450萬才值得入場。雖不少樓市專家都唱淡港樓，但我反而覺得如果你是剛性需求用家，這是絕好的買入時機，只要在市場上找到心態最弱的賣家，低於市價10%以上就可以考慮。
港人面對過沙士，雖然呢隻武肺係新嘢，而且傳染性強，但今次港人除了有經驗外，還有是業主結構上有所不同，現時業主實力比03年強得多，六成人供滿層樓，無急切賣出需要。另外未供完的四成，分兩批，09年前買入的，升了最少一倍，09年後買入的，經歷不同樓市辣招和壓力測試才上到會，加上近十年升幅，無力供樓而要放棄的少之又少，加上疫情期間，係人都知依家放樓最蝕底，低價放盤者居少數中的少數。
但若果你是用家又是高收入人士，兼可以受惠於早前800萬借九成那種，若搵到真正筍盤或發展商優惠貼市開價，幾十萬首期就值得諗諗。惟恐未來經濟差會影響收入的，可選擇輕鬆一點的月供金額。
小弟由2017年起寫文章已斷定，港樓升跌不會超出20%這幅度，詳情可以自行Google一下。就算加上現時疫情，亦不會改變。你睇恆指連漲已經反映市場對疫情未來六個月的看法，當然，這跟中央放水有關係，但投資者的聰明錢亦反映對前景看法並不太淡。反之，亦不會大漲，就算疫後中央大力放水，受惠的只是大陸地區，香港經濟有其政治及結構性核心問題，不易解決。下期講下大陸樓。
作者為《HEA富學》作者，Finsight ED founder
www.finsight-ed.com
https://www.facebook.com/heaology.edu
HEA富專欄 - 郭釗 舊文
來源 source: http://www.am730.com.hk
