油價傳來好消息，「三桶油」帶起港股低位挾足500點，短線似可再挾一轉。值得留意，周四波幅唔細之下，大市成交只有897億
銀，傳統智慧話齋，細成交升代表動力唔夠，但換個角度睇，不用太多錢就能推上去，代表沽壓減輕，有力向上再挾。目前牛熊街貨係三七比，如油市談判有進展，借勢推高至23800附近亦不困難。
近排通街都博油股，3月9日石油價格戰開打，油價單日狂瀉3成至30美金，當日中海油（883）收報8.79元，中石油（857）報2.72元。噚日油價不過彈番去22美金，中海油已幾乎收復所有失地，中石油更是升凸1成，再上仲有幾多水位？賭油價再彈的話，用石油ETF去博會著數啲。
油服股方面，美股頁岩油公司Whiting在愚人節入紙申請破產，反映行業已出現資金鏈斷裂問題，爆煲應陸續有來，香港上市的油服股（除中海油服（2883）外），小弟就不會以身犯險了。其他板塊方面，疫情陰霾未除，大陸有開廠都未必有單，所以製造業、出口股暫不考慮。信心較大的目前只有醫療、5G及網購股，中興通訊（763）蓄勢再上，值得留意。
筆者為證監會持牌人，持有中興通訊財務權益
魏力
http://fb.com/2012jason
本欄逢周一、五刊出
異動空間 - 魏力 舊文
來源 source: http://hk.entertainment.appledaily.com
