【智取大市】香港剩餘嘅優勢 - 晉佳
未來香港優勢，一切都同中國利益掛。 資料圖片
呢一刻大家好明顯睇到香港失去乜嘢。一個只剩下中國形容為「國際金融中心」嘅香港，會留低乜嘢特色？
如果估美國禁止香港銀行以美金結算，令全球攬炒似乎玩得太大，但港元已非過往般絕對安全，足夠維持到香港係
美金自由兌換嘅中國投資集散地，對中國嚟講就可以。外資喺香港仍然存在，因為中國需要佢哋嘅服務，而外資資金仍然高度安全地自由進出，前提係，識得政治正確嘅話。過往十年講compliance，未來十年就講政治正確。國泰事件後，每間大型外資機構嘅香港分部大概要整返個「首席政治官」確保公司上下政治正確，免得成為幹預香港事務嘅外國勢力，出事嘅話搵返個香港人做箭靶，然後錢繼續賺。
香港仲係熱門集資地。你間公司想吸引大陸資金，或者大陸公司想海外集資，港股仍然係絕對選擇之一。由於中概股唔能夠喺成交最具深度嘅美股市場上市，香港仍然係次一級選擇，至少成交依然比其他亞太股市活躍。你睇現時乜嘢公司會喺香港上市？未來似乎冇乜分別。未來香港嘅優勢，一切都同中國嘅利益掛鈎，至於香港有冇對中國冇利益嘅優勢存在？Sorry，有嘅話都可能會逐一被消失。
晉佳
http://fb.com/advanceguy1
本欄逢周一、三、五刊出
智取大市 - 晉佳 舊文
來源 source: http://s.nextmedia.com
