【廣告經綸】化敵為友 掃街新招 - 文廸晞
限聚令放寬，香港人久休復聚，猶如放監，一方面紓減壓力，同時都要出手打救一下香港經濟。
資料圖片
自2月初，疫情越見嚴重，香港人本身已經唔係好敢出街食飯，再加埋封舖限聚，令好多飲食老店、小店窮途末路，頂唔住要關門大吉。連續17日無本地確疹個案，
但見逐步解封，久休復聚，猶如放監，群情洶湧，一方面紓減壓力，同時都要出手打救一下香港經濟。
食飯由4人擴大到8人一枱，我坐言起行，打算book今個星期六、日與家人出街食晚飯慶祝母親節，點知打咗去幾間平時去開的酒樓飯店，竟然全部full曬。果然，限聚令一放，大家都久旱逢甘露，午市晚市定單突然飆升。
食肆有機會復蘇，固然是好事。但係，最可惜的有很多大家愛戴的老品牌和小品牌都已經一去不返，如今想救都救唔返。如此一來，大家不妨度條好橋，救市救舖，唔好畀佢哋再執。有冇諗過，同一條街或開喺附近的餐廳，平時爭到你死我活，如今可以化敵為友？例如，當你去中環歌賦街，坐喺九記牛腩食緊一碗上湯牛腩伊麵嘅同時，又可以叫埋對面勝香園的檸蜜脆脆，兼夾翠華樽仔港式奶茶，爽嗎？仲可以搵人幫手寫個點餐平台，綜合多份餐單，一張單，一次收錢，之後慢慢結算。
就算唔親身去，有時叫外賣，想起那些Deliveroo、foodpanda、Uber Eats，一餐飯一家人或成班friend想叫唔同餐廳的招牌菜，現時只好分開幾張單order，搞到送餐嘅時間前後不一，一餐飯，要分幾次食。用番同一概念，其實好簡單，條件係只要那些餐廳位於同一條街、或者附近，沒有理由那些外賣速遞平台不可以一張單落多幾間餐廳的食物，叫外賣開心、食得開心、餐廳又開心，只要安坐家中，有人代你掃街，真正一舉多得。
文迪晞
mailto:heyadmen@gmail.com
廣告經綸 - 文廸晞 舊文
來源 source: http://s.nextmedia.com
