【異動空間】萬事俱備等開車 - 魏力
聯想控股董事長寧旻。 資料圖片
港股鑊氣之盛近年罕見，龍頭股爆到七彩之後，資金逐步流向低殘股尋寶，快人一步進駐，唔使買太多，齋賺幅度已夠和味。跟2015大時代一樣，今次又係阿爺指揮牛市，北水湧港掃貨，要大贏特贏，重中之中係睇北水持貨比例，揸到成手貨
，定價權在大媽手上，貨源歸邊，真係任舞唔嬲！聯想控股（3396）就是其一。
先查CCASS，於中國證券登記結算的持貨高達64.9%，連同其他投行持股，首五家券商持貨已近83%，一個字：乾。有圖有真相：兩年半前，聯控炒H股全流通，兩星期內由20蚊爆上36蚊，氣都唔喘，就知貨乾的威力。
再睇成交，4月以來聯控低位橫行，股價悶到爆，但成交卻靜靜轉旺，甚具收貨意味，昨日大陽燭突破橫行區頂部10.4元，確認展開升浪，上方最近阻力已在16蚊樓上，現價值博率甚高。
又貨乾，又收齊貨，圖表破位之餘，仲有一大爆升誘引，就是資產大折讓，現時每股NAV成28.7元，市賬率僅0.42倍，半價有找。資產賤賣，最易聯想到的就是今年大熱的私有化概念。聯控本身為投資控股，持有聯想（992）近30%股權，貢獻大部份盈利。另一方面，聯控亦進行多項戰略及財務投資，最近就有開拓藥業（9939）上市，識於微時又賺一筆。
更筍的是，聯控通過旗下聯想之星和君聯資本，大量投資於AI應用及光芯片領域，今年芯片股的表現毋須多說，聯控作為「基金中的基金」，價值隨時在本輪升浪發揚光大！
筆者為證監會持牌人，持有聯想控股財務權益
魏力
http://fb.com/2012jason
本欄逢周一、五刊出
異動空間 - 魏力 舊文
來源 source: http://s.nextmedia.com
