笑到最後｜身體右傾支持美股不斷破頂（高明）
美股道指破三萬點，納指亦再破9月及11月頭高位，股市狂歡嘅另一面係美國失業率6.9%仍然高企。有一說法，經濟差，加上拜登疑似黃袍加身，將會令左傾思潮加強。本欄當然唔認同，以現時走勢而言，未來有兩種主流思潮：支持右傾同身體右傾。
拜登只係一個
四平八穩政客，今次大選根本冇人支持佢，最多只係反侵。拜登唔見得好左，政綱最左嘅政策，就係加稅。
網上有疑似美國公司電郵寫：預計拜登上台會大幅加稅，公司無法承擔，唯有炒60名員工，至於點揀？管理層話隨意落停車場，見車上面貼咗支持Biden Harris貼紙就派發60封大信封，求仁得仁。
冇刻意核實，似乎封信係網絡潮文多於真公司信。但都反映咗正常人嘅睇法，就係唔鍾意交稅。侵上台後減稅，淨係睇數字，已經減低過發達國家一截，交過低稅好難交返高稅，所以香港人對移民咁糾結，根本冇人想交多啲稅。
更加重要係美國有羅賓漢之類嘅經紀，交易免傭，疫情留喺屋企，引誘咗好多原先唔會投資嘅學生用一千幾百美金去炒股。有炒過股就會明白，一日投身資本市場，一世都有心癮買賣，因為比起每月捱生捱死打工賺錢，資本市場價位升跌好容易就賺/蝕咗幾年嘅糧，感受過「墜落嘅資本主義」，就會覺得搵議員成功爭取嗰一千幾百美金福利金好無謂，不如花時間自己炒好過。
身體右傾嘅意思，就係行動支持資本主義經濟活動，但把口未必一致，代表人物就係眾議院議員Alexandria Ocasio-Cortez(簡稱AOC)，聲稱反對資本主義，但同大家一樣用iPhone、飲Starbucks、戴Movado錶，過住非常美式資主主義生活，呢啲就係典型左傾同左膠嘅最大分別，左膠就係支持左傾所有議題，然後自己身體唔跟，過返正常資本主義生活。再進一步左癌：成為左膠後，用權力逼人接受左傾社會規範，然後自己過返資本主義舒適生活。
身體右傾大行其道嘅惟一好處，就係上完舊社交媒體撐左翼思想後，就會開個羅賓/pp炒股，保證股票繼續強大，有新血新資金。所以不論最後邊個成為美國總統，高明對未來四年美股前景都非常樂觀。
https://www.facebook.com/bigricetea
-----------------------------
掌握理財智慧 感受生活品味
investMAN全新網頁 優雅登場
-----------------------------
部署退休 輕鬆達至財務自由
點擊即睇《退休理財天書》
-----------------------------
【全球樓行】 Dream House零距離
屬於香港人的移民攻略
-----------------------------
支持蘋果深度報道，深入社區，踢爆權貴，即Like蘋果專題及調查組FB專頁！
笑到最後 - 高明 舊文
來源 source: http://hk.news.appledaily.com
