士佳說 - 張士佳 2020年11月9日
【#士佳說 】張士佳：七國咁亂
【#士佳說 】張士佳：七國咁亂
周末最搶flow的莫過於拜登夠票當選的消息，不過特朗普唔認輸，不停掀起訴訟，甚至有州分話要重新點票，雖然有d州分駁回申請，但若案件提升至最高法院，特朗普早前的任命就係關鍵的一著。另外，早前講過12月14日選舉人投票後，如不夠270票，就會由眾議院每州一票方式選總統，所以特朗普到現在仍未認輸。
以上都係查資料先得知，陰謀論去睇，就係繼續較勁，故此，拜登發言振奮民心，明顯是要團结國民，話俾你聽我係眾望所歸，令選舉人未必夠膽失信，總之就各出奇謀，七國咁亂。
拜登外交貿易採取表面較溫和路線，所以5G，芯片與新能源有炒一炒，人民幣亦勢如破竹，收復貿易戰開打以來的一半失地，但算盤是否咁易打，不要忘記仲有個強悍而對華不甚友善的賀錦麗。
大市今日回來就梗係高開挑戰26000水平，但究竟能否撐到尾，就係一大考驗，過到這關我會鬆手些，遇到好股會買大點，但對於脫離熊市陰影，我唔敢講，等下隻腳時，才放手一博安全好多。
不過，個股板塊都仍係你有你牛，佢有佢熊，各自各精彩，各自各行，我上周五預告，新能源車我會走一走，走完，果現抖氣現象，比亞迪#1211我AO＄200走，189.X買番半就算，蔚來NIO市值已經超過BMW及DAI（戴姆勒奔馳），是否太快，要做大是否理應抽水，唔知？反正升得咁誇，食半留半係理性做法。
既然拜登有機上場，可以講過去瘋狂的四年也有機終結，我投資上會開始留意些正路股，創科#669白皮黃心，在中美貿易磨擦這兩年理應受累，但卻升了一倍多，現中美磨擦有可能降溫，是真正亮劍之時還是好消息出貨呢，長遠我傾向前者，但短線陽燭突破$115或可以一炒。
海運股我捉得應，#1919與#1308升得幾爆，物流係下一個順理成章的行業，#636股價走勢突出，不妨關注。
共和黨興減稅，民主黨興放水，所以市場預期拜登會放水，放水引起通脹機會，故此黃金股又升，紫金已創11年新高，現做6.68，下個目標自然係歷史新高，能否挑戰9.733唔知，但係咪都炒下。
我尋日比賽打左7場波，作為一個上左年紀的後生仔，有點過火，今日抖一抖，寫少D，哎！最後寫多隻啦，我曾講乳業股得奶源得天下，#2319蒙牛比飛鶴追過，成為市值老二，雖然一個做液態奶，一個做奶粉為主，但都係乳業，蒙牛近日趁有勢，會試圖追番上來重奪一哥寶座，如果能陽升穿41.35，有机擺脫近日高位反覆的局面。
士佳說 - 張士佳 舊文
來源 source: http://skycheung.weebly.com
