操盤手劄記｜「罰即愛護」新炒法（割柑人）
馬雲牽頭創辦嘅湖畔大學被禁招生，以削其影響力。
BAT呢期當黑，先講B—百度（9888），3月23日在港掛牌以嚟，只得首日守住招股價252元，迄今累跌16.7%。至於A—阿里巴巴（9988），因涉「二選一」壟斷，上周六被重罰破紀錄182.28
億元人民幣。講到T—騰訊（700），則大股東Naspers上周三收市後宣布減持，掟貨逾千億元。
當中，阿里最黑。上年11月旗下螞蟻上市被煞停，上年12月同今年3月又被指涉壟斷，兩度被罰50萬元人民幣，創辦人馬雲行蹤成謎。上月《華爾街日報》指，中央擔心馬雲輿論影響力，促其出售傳媒；上周五《金融時報》又指，馬雲牽頭創辦嘅湖畔大學被禁招生，以削其影響力。
據講湖畔大學招聚一班中國頂尖企業家，部分高官視之為精英集中地，有昔日黃埔軍校影子，擔心影響黨嘅領導。令人想起2019年中，《南華早報》報道，李嘉誠被其創辦嘅汕頭大學排除在外（sidelined），李家喺該校嘅影響力沒落（wane）。大孖沙辦學，隨時踩到國家紅線！
阿里受罰，靴子落地，券商則意見分歧，有指可緩解反壟斷調查壓力，罰則又可作科企參照；亦有指反壟斷行動冇咁快完。事實上，外電報道，市監局正增聘人手，加強反壟斷調查。聽券商講，不如聽下官媒點講，《人民日報》就話：「處罰阿里巴巴...扯袖子也是一種愛護。」
阿里喺「處罰也是愛護」，兼且一來罰款雖鉅，未算入肉，二來電商反壟斷、金融科技合規兩大監管風險除去一瓣下，周一反彈6.5%。不過，科技股未擺脫反壟斷陰霾。下個受罰是誰？處於主導地位嘅大型互聯網平台，如騰訊、美團（3690）係大熱。想買科技股巨頭，不妨等待當局對其「處罰、愛護」未遲。
割柑人
-----------------------------
蘋果初心不變！26周年「撐蘋果Tee」預售：
你的優惠訂購（海外訂購按此）
-----------------------------
掌握理財智慧 感受生活品味
investMAN全新網頁 優雅登場
-----------------------------
點擊即睇《Bitcoin投資入門手冊》
一書盡覽新手必讀資訊
-----------------------------
【全球樓行】 Dream House零距離
屬於香港人的移民攻略
操盤手札記 - 割柑人 舊文
來源 source: http://hk.news.appledaily.com
