佬訊專欄 - 佬訊 2021年5月24日
佬訊專欄｜在工作中自肥（佬訊）
高溫30幾度，都不及Error與Mike導團隊自肥的討論熱度。剛過去的週末，無論是朋友聚餐，抑或是社交媒體，統統都是有關自肥的資訊碎片。
執輸行頭，慘過敗家；無睇自肥，分分鐘變社會邊緣人。遲了幾日終於追返，內容大意方面，其他KOL講得七七八八，反而想講下自肥背後的精神。
出嚟社會一段日子，總會見識過這種人：認為返工是「幫人打工」，是犧牲與浪費了自己的才華及精神，去成就老闆。所以，他們對工作從來不上心，覺得與其幫人打工，倒不如自己搞啲嘢。
實不相瞞，佬編也曾經有這種想法。直至有個好好的師兄離職，farewell的那一晚，他帶著醉意說：「無論喺邊到做嘢，記得要攞啲嘢走。」
所謂「攞啲嘢走」，其實就係自肥，可以是知識、技能，也可以是人脈，甚至是教訓。多了這個角度之後，無論再枯燥、無理的工作，好像都開始有點意義。
而且因為有了「攞啲嘢走」這個目的，開始懂得分工作的緩急輕重。這裏講的緩急輕重，不是上司老闆的priority，而是自己的發展成長。或者可以說，是識得走位、識得position自己。
佬編好膚淺，通常諗完自己就算，但也見識過其他叻人，在個人成長層面自肥之後，會再進下一步，利用公司資源，去做自己想做的事。
所謂公司，無論規模幾大，都不過由人組成。作為龐大機器之中的齒輪，如何擴大自己的影響力，將自己放在對機器運轉有些微影響力的位置，是每個人要思考的問題。
常說一間公司，冇話冇咗邊個唔得，但在佬編觀察中，有些人離開之後，那間公司就大不如前。努力工作，好好生活，總有一天，你也能成為這種人。
佬訊
https://www.facebook.com/loshunhk
-----------------------------
蘋果App大升級 更簡潔更就手！了解更多（立即下載體驗）
-----------------------------
點擊即睇《Bitcoin投資入門手冊》
一書盡覽新手必讀資訊
-----------------------------
【全球樓行】 Dream House零距離
屬於香港人的移民攻略
佬訊專欄 舊文
來源 source: http://hk.news.appledaily.com
