操盤手劄記│中概科技股 收貨近尾聲（割柑人）
操盤手劄記│中概科技股 收貨近尾聲（割柑人）
上季阿里再跌超過三成半，芒格愈跌愈撈。
美國上周五公布嘅就業數據顯示，職位增長連續兩個月大幅差過預期，雖然或令聯儲局收水步伐窒一窒步，但亦反映經濟復甦轉弱，美股三大指數先揚後軟，微跌收場。
事實上，市場仍然預計當局下月宣布收水；另外，雖然債務上限問題可望拖到12月，但前財長努欽警告，債限風險仍在，政府開支過度可能加劇通脹，推升債息。10年期債息升穿1.6厘，高見1.6153厘。
下載Yahoo財經APP
美股、外匯、加密貨幣免費即時報價，自選投資組合獲取相關新聞提示。
本周嘅重頭戲係美國、中國公布9月通脹數據。喺疫情擾亂供應鏈，能源價格、原材料價格，以至運費統統急升下，世界第一、第二大經濟體通脹情況如何，成為市場焦點。美國將於周三、周四分別公布CPI、PPI；中國將於周四公布CPI、PPI，受限電限產影響，市場估計PPI將進一步上升，而PPI升幅最終會否傳導至CPI，則有待觀察。順帶一提，周四港股重陽節休市。
油價持續漲 大鱷項莊舞劍
無疑，通脹甚至滯脹，今季仍將纏擾全球金融市場。作為「通脹之母」嘅石油，成為抵禦通脹嘅最佳對沖工具。繼布蘭特期油前周突破每桶80美元關口後，紐約期油上周五亦突破80關，高見80.11美元，係7年嚟首次。要注意係，對沖基金可能「項莊舞劍」，真正目的係通過推高期權價格加大油價波動，以衍生產品獲利。觀乎歷史，每次油價大升，之後都會大跌，伴隨世界經濟衰退。有分析指，通脹同美國衰退之間嘅神秘連繫，就係油價升到90美元左右！
油價上升，帶挈油股受捧，中石油（857）上周就以一成升幅，登上港股藍籌升幅榜冠軍。至於亞軍，則係近月連番破底嘅阿里巴巴（9988），上周錄得9.4%升幅。阿里谷底回升，並非中國監管風暴歇息，只因股價愈跌愈殘，吸引價值投資者低吸，包括「股神」畢菲特拍檔芒格。芒格旗下Daily Journal向美國證監會提交嘅13F季度申報顯示，截至9月底，持有30.2萬股阿里美股，較6月底增加13.7萬股，倉位大增八成，持倉總值4,500萬美元，佔投資組合總值兩成。
低位收貨後 大戶開腔唱好
芒格喺4月申報首季持倉時，首次披露持有阿里美股16.5萬股，由上年10月尾高位至今年首季，阿里期間最大跌幅超過三成，芒格撈底意圖明顯；而喺上季，阿里再跌超過三成半，芒格愈跌愈撈。阿里現價預測市盈率約15倍，投資價值喺全球科網巨企中最為吸引。事實上，阿里盈利續見改善，截至6月底止季度，以non-GAAP計，按年多賺一成，股價尋底，造就低吸機會。
繼97歲股壇老將芒格大手加倉阿里後，基金巨頭富達亦加入唱好中概科技股。據《路透社》引述富達中國特殊情況投資組合經理Dale Nicholls講，佢已重新將資金投入中概科技股，因為目前風險回報唔錯。大戶開腔唱好，可能由於低位收貨已近尾聲。想搭大戶順風車，最簡單係揀科指ETF，香港現有4隻追蹤科指嘅ETF（連同以美元計價則有6隻）：安碩恒生科技（3067）、華夏恒生科技（3088）、南方恒生科技（3033）、恒生科技ETF（3032），計及管理費、追蹤誤差等因素後，以3067相對抵買。
割柑人
曾任財經記者、編輯，在本港報章撰寫財經專欄逾十年
www.fb.com/hkstockpicker
本欄逢周一刊出
操盤手札記 - 割柑人 舊文
本文作轉載及備份之用 來源 source: http://hk.finance.yahoo.com
