士佳說 - 張士佳 2021年10月11日
【#士佳說 】張士佳：休息工作再工作
【#士佳說 】張士佳：休息工作再工作
近日筆者常強調反趨勢，穿底會彈，破頂會跌，弱股會彈，強股會跌，不正是今日的寫照嗎？
隔晚美國延長債務上限，美國三大指數都有所反彈，令恒指週五如期高開，不過一高開似是破位便隨即回落，個股更是跌到七個一皮，好似大市跌六百點咁，這情況唔難預測。兩三個月前，我話ATM咁差，基金經理會放棄，一部份錢自然會流入另一些中價股，同ATM市值爭咁遠，一直以來嘅每日成交量都冇得比，求其攞啲過嚟，都浸死呢啲中細價，所以你見到我講嗰啲#1811/#836， 升到好似火箭咁，但上個禮拜開始，ATM 各有際遇了。
市場覺得芒格大幅增持係一個撈底信號，似乎排除了中概股在美國的危機，股價在前，消息在後，阿里收市又出好消息。旗下淘寶特價版商家開始大批簽約開通多元化支付協議，或在月內接入騰訊微信支付。商家陸續簽訂開通協議，推動互聯網平台企業開放保障消費者支付選擇權等，配合反壟斷政策。中央對科網巨頭監管減退，整個阿里系已慢慢轉強。
另一方面，雖然手遊的審批有減慢，但騰訊仍成功在週五發布了期待已久的英雄聯盟手遊版。此手遊已講了兩年，週五再有收購波蘭遊戲廠商，可算是為騰訊沖一沖喜。
關於美團#3690，在網絡餐飲外賣平台服務市場實施二選一壟斷行為罰款落實了34億，仍如此強勢是ATM中最強的，是否壞消息盡出？這個罰款為美團去年銷售額僅3%，亦係先前亞里嘅兩成，消息明朗化市場最喜歡，配合疫情好轉旅遊酒店銷售回暖，所以極强。
那些電，新能源升咗咁多， 而ATM又跌咗咁多，即係先前呢個換馬成功咗，咁而家ATM有返勢頭，基金經理梗係番兜，換返轉頭，一出一入，板塊自然就變成咁樣囉。
再加上消息配合，阿爺話要同步過冬，放寬俄羅斯及印度煤炭進口，而且要組織各地煤礦加大產能，中煤能源#1898、兗州煤業股份#1171受重創。不過，中線來講，難以大跌，開採掘礦需時，加上山西大雨，洪水肆虐，國內最大產煤大省山西27座煤礦停產，一時半刻很難緩解越趨緊張的需求，等佢反覆一下先，有機會見信號再買。
而傳統電力在煤炭綠電供給緩解下，如華潤電力#836、華能#902、中國電力#2380當然下跌，呢啲股我三個月前係低位叫買，然九月上堂嘅時候，已經叮囑唔好追，大佬，電力股咋喎，真係會飛咩，民生嘢，阿爺會俾你加價咩，升到咁已經係超預期，唔食糊就係太天真。
大家又問，咁而家點算？有啲乜嘢股可以留意，第一，留意多些先前弱勢嘅本來強勢股囉，再約梗係爸爸系啦，仲有嗰啲鋤大D啊鬥地主系啦，星期五都升返上黎；第二咪留意吓啲星期五都表現穩定嘅股囉，好似先前弱過藥煲嘅保險股，週五拉動市場從低位回升都係靠佢哋，市場對內房地方債的緒緩和，對保險公司持有地產類風險的隱憂有所消退，加上中國平安#2318已減低對華夏幸福相關投資資產，之前已經超跌反映。近日在其強勢帶動下，好多內險股如中國太平#966都等紛紛反彈，不過呢啲恒大相關股，最多最多小注移情好了。
港口股，上週都不太受chok市影響，表現得穩定，有持續慢升趨勢，隨著環球經濟復甦，港口吞吐量仍保持穩定高增長，招商局港口#144業績超勝預期純利大增220%至45億元，中遠海運港口#1199亦不容忽視，節節上升。同時，疫情逐步好轉已是利好一衆航空股，#670中國東方航空，#1055中國南方航空，#753中國國航都朝著250天進發，圖表靚仔的#2588中銀航空租賃都值得留意。甚至國際旅遊喼#1910新秀麗，我走下位之後都似乎找到支持。如果突破，呢啲後疫情股都係大市稳中之選。
第四季我繼續鍾意建築及水務，大家自己做下功課啦。另外，而家朝朝寫士佳說，連埋睇圖諸如此類，都要幾個小時，變成工作工作再工作，實在太累，但見外面唔識玩嗰啲散戶朋友，水深火熱，所以死頂，捱到五勞七傷，而家局面明朗化左，彈返咁上下，只要記得食糊，蟹貨咁多唔好睇得咁好就得了，去到呢個階段，寫埋今個禮拜Sky說會暫停，休息一下，今次先休息番一兩個月先啦。
士佳說 - 張士佳 舊文
本文作轉載及備份之用 來源 source: http://skycheung.weebly.com
