操盤手劄記｜科網龍頭洗牌過莊？（割柑人）
操盤手劄記｜科網龍頭洗牌過莊？（割柑人）
阿里上季收入按年增長29%，經調整純利按年減少39%，遠比市場預期差。
榮辱互見！美股三大指數中，主要反映科技股嘅納指，上周五首次突破16000關收市，兼連續兩日破頂；反觀港股科指，則連跌3日，兼
拖累恒指連跌3日。港股正值科技股業績期，上周二收市後網易（9999）派成績表，上季純利按季倒退；上周三收市後輪到百度（9888）、嗶哩嗶哩（9626），季績都差過預期；上周四收市後就到京東（9618）、阿里巴巴（9988），後者季績遠差過預期，翌日股價插水逾一成，收139.3元。恒指「You jump, I jump」，跌穿10天、20天、50天線，險守25000關。
美股、外匯、加密貨幣免費即時報價，自選投資組合獲取相關新聞提示。
塵世間最痛苦嘅事，莫過於「比較」！榮辱互見者，何止納指同科指，仲有同日派成績表嘅兩大電商巨頭京東同阿里。京東上季收入按年增長26%，經調整純利按年減少9%，但遠比市場預期好；阿里上季收入按年增長29%，經調整純利按年減少39%，就遠比市場預期差。阿里管理層又調低全年收入指引，由按年增長30%下調到20%至23%，反映對今季、下季業績有保留。粗略計算，今季、下季收入增長將放緩到11%至15%。
阿里燒銀紙 提升競爭力
中國加強互聯網監管，先禁大數據殺熟，後禁平台二選一，市場預咗科企業績唔靚，但阿里張成績表走樣走到咁醜樣，就出乎意料。市場一地眼鏡碎，券商爭相下調目標價，據《彭博》資料，上周五出報告嘅10間券商，9間下調目標價，當中，摩通由250元劈落205元，劈18%最狠，瑞信睇176元最低，富瑞睇287元最高，平均值為211.5元。
面對同樣嘅大環境，京東、阿里收入增長力差不多，但盈利抗跌力就京東遠比阿里高，反映問題出於公司自身，多過出於中國整體消費放緩。阿里點解跑輸？主要因為應付反壟斷監管帶嚟嘅競爭，大量投資以提升競爭力，令經營成本大增。阿里上季成本佔收入比率達63%，按年大增9個百分點。阿里喺反壟斷下，競爭有幾激烈？最新形勢可由「雙11」銷售數據窺見，阿里商品交易總額（GMV）增長由26%大幅放緩至8%，京東只由33%小幅放緩至29%。
馬化騰預言 大洗牌將至
「雙11」戰績，加上最新季績，市場用腳投票，上周五京東逆市大升9.1%，阿里則大跌10.7%，轉莊咁款！經此兩役，阿里嘅中國電商龍頭地位恐防會易位。上年12月，京東大股東騰訊（700）嘅老闆馬化騰，喺旗下特刊《三觀》講到互聯網發展，預言「又一場大洗牌即將開始」，雖然佢講緊「全真互聯網」（即元宇宙），但會唔會元宇宙未到，電商先洗牌？
不過，阿里季績並非全無睇頭。誠然，四大業務中，商業、數字媒體及娛樂都差過預期，但雲計算好過預期，上季收入按年增長33%，經調整EBITA扭虧為盈，錄近4億元人民幣利潤，惟盈利佔比低，影響力不足。另外，阿里上月推出5納米自研伺服器晶片「倚天710」，係中國半導體嘅突破。要阿里過莊，未必咁容易。阿里股價由10月5日谷底132元回升至10月20日高位179.9元，按黃金比率計，現時所有回吐支持位（0.236倍、0.382倍、0.5倍、0.618倍、0.764倍）都已失守，若短線未能止瀉，或會破底。想作長線部署，宜確認短線築底先至撈貨。
割柑人
曾任財經記者、編輯，在本港報章撰寫財經專欄逾十年
www.fb.com/hkstockpicker
本欄逢周一刊出
操盤手札記 - 割柑人 舊文
本文作轉載及備份之用 來源 source: http://hk.finance.yahoo.com
