士佳說 - 張士佳 2021年11月22日
【#士佳說 】張士佳：回歸
【#士佳說 】張士佳：回歸
冇寫士佳說一段時間，上次寫嘅時候係24,900 ，升咗上去26,200 ，而家又到番24,900 ，大市升完跌返，冇乜表現，個股則繼續表現兩極化，不同股票創新高同創新低同時出現。我除咗上堂教投資外及集中力量炒股，就係成日打波，正膠生膠長膠打了一周天，不亦樂乎，然每次出嚟同學生食飯，佢哋都希望我快啲寫返士佳說，本來諗住2022年先至寫返，但大家誠意拳拳，唯有從善如流，早一個月開始寫返啦。
先講吓大市，始終恆大一眾內房影響，死下死下，美股又在頂部搖搖欲墜，以至10月21號以來，期指整整一個月都冇出現過上升裂口，下跌裂口就出現了三個，兼且現在跌到23,600底部至26,200頂部嘅中間位，可以話再跌就唔係咁樂觀。不過估大市咁難估，忽升忽跌，當中最似嘅都只係上落市，既然而家跌緊，我就想細注博返上26,000樓上，陰燭跌穿星期五底咪走頭囉，但都係玩票性質，個股準成度高好多，冇理由捨易行難。
上週五港股受外圍中概股下跌，阿里巴巴#9988業績唔對板，帶動指數裂口低開，早上失守25000點。但市傳中央降準，下午指數跌幅收窄。
先講下阿里第二季度業績，其實都唔使多講，我事前都同學生講，槍打出頭鳥，冇理由現在在強監管，共同富裕氣氛之下，你出個賺大錢嘅業績㗎，所以盈利下跌，係意料中事，嚟緊幾隻大野我都一樣唔博業績。
#9988股價跌至140元，接近前底，目前市盈率已經不足20倍的阿里，有150億美元的回購計劃額度未完全使用，唔應該再太悲觀，我雖然一股都冇，但就有𥄫住，第日企到$156樓上幾日，我就當佢見底，佢不斷開拓雲業務，甚至最受關注的半導體，雲數碼經濟等都有助其固本培元，如果監管力度有所退緩，換上國資雲科技創新等政策扶持，我又唔覺得真係咁差。
騰訊#700又係未買，但一樣虎視眈眈，傳聞指近期網遊版號可能會恢復發放，另外騰訊不會錯過元宇宙的龍頭位置，早前馬化騰便指出，騰訊擁有大量探索和開發元宇宙的技術和能力，相信很快便會開發出令人矚目的新企業，有興趣呢兩日搏一搏。不過而家乜鬼都元宇宙，做鏡頭嘅2382舜宇光學，D人又話鏡頭元宇宙不可缺，唔理啦洋燭升穿231.2 ，點都捧下場。
而美團#3690我就已經搏咗，26號出業績前會走一走，剛公佈，美團佔指數成份股比重由9.5%降至8%，或會引來一輪沽貨壓力影響，加埋業績出得唔好，這或是低位買入機會。
至於京東集團#9618第三季度業績勝預期升9%。京東無論在業績和股價已經開始跑赢阿里，增長動力在此消彼長下，加上染藍推助，市場已經選擇京東，雖然所佔唔成分不多，已經成為ATMXJ中最強勢，相信第四季表現仍可領先。
一個月前我做sun channel ，話俾大家聽元宇宙概念不容忽視，結果呢個概念全球發酵，如元宇宙世界硬件底層的 NVDA及芯片AMD都在美市熱炒連日上升。NVDA和AMD均又比生意柏能#1263，熟悉我嘅朋友，都知道呢隻我炒咗一段日子，水漲船高，週五就大升近15%。不過呢隻股都好chok，我食住先，等佢回一回再破頂先至再買。
。
週五北水淨買入最多的個股是同樣近期在低位配股的碧桂園服務#6098、今次是第三次融資，情況差唔差我唔知，我就望住配股前嘅收市58.95，企得穩喺上邊嘅，當然最好陽燭升穿63.2，我就當否極泰來。
上個禮拜五午後不但市傳中央會降準催谷一衆內房抽升，市場被提振，內房圖表中最靚升得最快都係#1109華潤置地，市場比較相信佢財務狀況，為內房的不二之選。
EV新能源汽車方面，近期造車新勢力受到市場追捧，在美國電動車新秀Rivian熱潮下，上市以來持續拉昇，而美股小鵬汽車XPEV.US做得不錯，港股小鵬汽車#9868亦表現吾差，股價表現比老大龍頭比亞迪#1211還要進取，不過王傳福話電動車對半導體的需求較傳統車多5至10倍，缺芯致700萬電動車無生產，暫時都係唔沾手為妙，我在Sun Channel都講過幾次，新能源汽車的零部件增量會更快更易炒。留意Rivian旗下產品主打電動皮卡。據悉，福特既是Rivian大股東，也是耐世特#1316的重要客戶，股價已從低位節節上升，洋燭升破11.18 ，會再關注。
上邊講過，電動汽車的繁榮離不開芯片，而且中國加快芯片發展已經刻不容緩，尤其是與汽車IGBT相關的。現時仍然是IGBT賽晶科技#580慢慢重拾上升，據消息，其自主研發的“柔性直流輸電用直流支撐電容器”（好老實講我都唔知係乜，總之聽落去就好勁啦），成功取得了首個批量訂單。是國產產品的首個批量訂單，在打破國外壟斷，實現國產替代更進一步，值得再關注。
消費股之一為handcream出名的歐舒丹#973又破頂，我有學生同我講佢收購美國護理品牌的Solde Janeiro over約80%的股權。美國上月零售銷售又強勁增長，市場相信有利於未來增長和盈利能力，我就等佢回返個像樣調整，先至再博佢爆一爆。
第一日寫返，唔寫咁多啦，咦，都寫咗好多啦喎。
最後講蒲中美雙方對話，都在光伏環保不遺餘力，先前愛股6865福萊特玻璃，上次出完貨，佢喺高位潛伏咗好耐，唔理啦洋燭升穿39.4 ，我點都補返一注，風電#2208都係，一股都無，破近月頂先追。
出住咁多先，剩返嗰啲留返同學生喺群組吹。
士佳說 - 張士佳 舊文
本文作轉載及備份之用 來源 source: http://skycheung.weebly.com
