笑到最後｜美股很危險 唔好嚟、千祈唔好嚟（高明）
笑到最後｜美股很危險 唔好嚟、千祈唔好嚟（高明）
隨著美股因為息口憧憬上升影響，美股股價接連受挫，特別係科技股為首。
隨著美股因為息口憧憬上升影響，美股股價接連受挫，特別係科技股為首，除咗由2020年底開始興起嘅待富股（前稱契媽股）之外
，近期傳染到霸權股都跌埋一份，打氣文都打咗幾次，今次不如叫大家唔好嚟、千祈唔好嚟。
美股、外匯、加密貨幣免費即時報價，自選投資組合獲取相關新聞提示。
美股處理加息，同埋香港處理疫情嘅手法，可以話係一個對照。美股採取息口群體免疫政策，只要債息一上升，即使實際融資成本未及反映，股價都提前下跌，情況有如現時入境好危險嘅美國，國家政策預期你進入境內等同感染Omicron，進入美股亦都要接受加息股價下跌洗禮，比起疫情更嚴重，美股一人一張嘴，呢頭聯儲局講完加三次，嗰頭大行話加四次，轉頭有唔使隔籬嘅大班話加多過四次，毫無市場紀律，股價又每次都信呢班人講嘢，講一次跌一次，所以美股真係好危險。
反而港股採用息口清零政策，今年港股年初至今上升3.2%，喺亞洲僅次於印度，表現亦都同其他新興國家並例升幅榜，明顯冇受加息預期感染，人民銀行更加透過逆回購及MLF操作，變相減息，連同12月降準，加上過去兩三年嘅升幅清零，亦令到港股喺今次轉變中好安全。
遷移到美股市場，淪為二等股民，表面上每隔一排你間證券行就會send一封電郵過嚟，話你知股東會有票投，實際上，你嗰一票，係無關痛癢，佢嘅Agenda亦都一早安排咗俾你撳Yes或者No，即使你覺得個CEO成日上Twitter（TWTR）亂噏不務正業，想投走佢，一來你冇權，二來你亦冇咁嘅能力。加上二等股民無資格抽IPO（少量券商可能有提供），反而香港一等股民有得抽IPO。
最大缺點係大球場
香港股民成日投訴港股操控多，股價升跌同大部份客觀因素無關。曾經當局都有行動改善，但今年已經係2022年，應該咁講：港股操控多？其實美股仲多，一個聯儲局官員講句說話，已經可以舞高弄低個市，講緊幾萬億上落，你亦吹佢唔脹，因為攞正牌影響息口政策。
美股最大缺點，就係大球場，就係英超咁嘅格局。根據Cboe數字，美股每日幾個市場加埋，成交額達4,200億美元；港交所數字，2021年證券市場平均每日成交金額為1,667億元。成交金額越大，即係個人越無影響力，喺市場中只係一粒塵，冇人會多謝你，太遠水路亦都冇得去股東會食自助餐。高明去過巴郡（BRK.A/B)股東會，去到又冇自助餐，又冇股東禮物送，又要自己畀機票，只係畀你見兩位老人家上台棟篤笑三粒鐘，全程飲食禮物甚至泊車都要自費，巴郡持可口可樂（KO），好明顯我係股東嘅股東，但飲杯可樂都兩三美金，諗落都係唔想再去，情願留喺香港等股東會喺美麗華定係文華搞，到時去擦返餐。港股細有細玩不知幾過癮。
聽完以上嘅故事大家都知道美股好危險，美股加息嘅一套不能放諸港股，覺得升咗上去然後下跌好危險嘅人，應該留返喺股價上落都好穩定嘅港股，支持減息降準利好股市。
高明
facebook：https://www.facebook.com/bigricetea
IG：https://www.instagram.com/koming.usstocks/
作者簡介︰賺錢係目標，炒股係手段，專欄記載由手段到目標嘅過程。
本欄逢周三刊出
笑到最後 - 高明 舊文
本文作轉載及備份之用 來源 source: http://hk.finance.yahoo.com
