操盤手劄記│中國先降準 減息嘆慢板（割柑人）
操盤手劄記│中國先降準 減息嘆慢板（割柑人）
內地宣布降準0.25個百分點，放水5300億元人民幣，但人行維持MLF利率不變。
高燒不退！講緊嘅係環球通脹。英國3月CPI按年升7%，30年嚟最高；美國3月CPI按年升8.5%，40年嚟最
高。美國總統拜登繼上月後，再度將高通脹歸咎俄羅斯總統普京。民間點睇？網民翻政府錯判形勢舊帳：上年4月CPI 4.2%，儲局話「Inflation is transitory」；上年10月CPI 6.2%，儲局話「Patient on hikes」；今年2月CPI 7.9%，拜登話「Putin's price hike」，搵普京孭鑊，但將Inflation變PUTINflation亦難卸鑊，拜登支持率跌至40%新低！
拜登民望持續下跌，而被視為總統中期考試嘅國會選舉將於11月8日舉行，對於執政民主黨嚟講，係一個警號！通脹問題之外，拜登健康問題亦令人擔心。上周四，復活節假期前夕，拜登喺一場演講結尾講完「God bless you all」後，向右轉身伸出右手，似要同人握手，但台上無其他人，佢隨後收回右手，轉向後又轉右再轉左才步下講台。呢幕「同空氣握手」嘅詭異畫面，引起政壇熱議。
A股出現類似Fed Put預期
上周五Good Friday，環球主要股市休市，包括美、英、法、德、香港等；不過，滙市仍有報價，喺預期儲局倍速加息縮表以遏制通脹下，美滙指數高見100.57，創兩年新高，環球資金流向美市，人民幣低見6.38，港元低見7.8447。同日，中國宣布降準0.25個百分點，放水5,300億元人民幣，但人行維持MLF利率不變；隨著降準落地，本月（周三公佈的LPR）減息機會下降，事實上，喺CPI同PPI高過預期，以及美國加息下，中國減息操作受到掣肘。
中美貨幣政策背馳，上周一已引發中美10年期國債孳息率12年嚟首次倒掛，最新分別報2.82厘、2.83厘，仍然倒掛。被視為無風險資產嘅美債利率高過中國，勢令外資套息交易加快平倉，波及人民幣滙率。債市、滙市之外，股市亦受影響，但情況相對複雜，因中國資本市場高度管制。現時支撐A股嘅，某程度上係類似「Fed Put」嘅預期——央行會採取行動以支撐資產價格。
阿里負面纏身值博率低
換個角度嚟睇，中國似乎樂見中美息差倒掛，因人民幣持續高企，不利中國出口賺取外滙。不過，今輪息差倒掛主要嚟自美國債息急升，而喺美國11月中期選舉嘅背景下，儲局加息縮表步伐可能先快後慢，未如市場預期咁快，估計今輪息差倒掛持續時間同空間有限。講到美國中期選舉，拜登政府為保民主黨喺國會嘅控制權，或會喺中國問題上轉趨強硬，不利A股以至港股。
上周四，美股道指、標指、納指分別跌0.33%、1.21%、2.14%；上周五，A股滬綜指、深成指分別跌0.45%、0.56%。要注意係，ATMJN美國股價分別較香港低1.95%、1.84%、2.42%、2.01%、0.9%。當中，阿里巴巴（9988）上周連環爆出負面消息，包括「股神」巴菲特拍檔芒格持倉腰斬、阿里雲多名高層離職、中紀委插手調查螞蟻。阿里來港掛牌以嚟，美資股東已7度大舉搬貨來港，之後都見沽貨。睇阿里機構投資者向美國證監會申報資料，上季減持嘅大戶有1,500多家，增持嘅只有500多家，淨減倉總值154億美元。按此趨勢，阿里易跌難升，值博率低。
割柑人
曾任財經記者、編輯，在本港報章撰寫財經專欄逾十年
www.fb.com/hkstockpicker
本欄逢周一刊出
操盤手札記 - 割柑人 舊文
本文作轉載及備份之用 來源 source: http://hk.finance.yahoo.com
