笑到最後｜Costco霸權解密（高明）
笑到最後｜Costco霸權解密（高明）
另一令到Costco特別平嘅原因就係，平均每個倉嘅庫存只有4,000種不同產品。
如果大家去過外國旅行入過Costco（COST）（唔使太遠，台灣都有Costco好市多），就會發覺只係一間裕記+佳寶+街坊士多
嘅超巨大版，入邊可以話係一個貨倉，同時亦都叫天不認叫地不聞，你想搵某樣嘢，搵個人問，係冇嘅。但係呢隻股票過去一年升接近六成，同期Tesla（TSLA）升65%，蘋果（AAPL）升41.7%，一間裕記竟然有科技股級數嘅升幅，究竟呢個世界上邊度先係神奇嘅地方，有時睇股價就略知一二。
美股、外匯、加密貨幣免費即時報價，自選投資組合獲取相關新聞提示。
炒股票最緊要睇個名，全名係Costco Wholesale Corp，個名已經話俾你知做批發，所以你上網搜尋呢間公司睇相嘅時候，見到內櫳同貨倉冇分別，就會明白佢預顧客係大規模買，而唔係去超市買幾件嗰隻。
住喺香港好難明呢種消費模式，畢竟現時買一個冇房新盤單位，隨時要600萬港元，一入門口已經上床，買八罐汽水返屋企已經嫌阻埞，邊有可能批發咁買24罐一板。呢種消費模式嘅轉變，除咗最近好興嘅移民直接住北美之外，另一個途徑，就係睇荷里活片去理解。
成本低+會員費
隨著科技嘅進步，實體超市可能係現存最有趣嘅業務模式，既然買咁大批，網購又咁方便，超過一定購物數量免運費，點解實體超市依然生存到？呢個問題係一個超越Costco股票本身嘅問題。事實上，現有嘅實體超市股票仍然眾多，間唔中都會見到一兩隻爆升。經歷咁多年嘅阿馬遜（AMZN）狂潮，仍然生存到嘅超市股，肯定有不可告人嘅商業秘密。
返去上邊嘅Costco，頭先已經講咗，成本低就係佢成功嘅來源之一，用肉眼可見嘅就係冇裝修、冇職員，成功降低成本。
但係呢啲嘢裕記都識，真正來源係會員制，分別收60美元或者120美元不等，爭在要唔要回贈。
雖然只佔總收入嘅2%多啲，但係就佔盈利嘅超過一半，基本上會員收費對於會員形成咗一種內循環關係，透過收取會員費去令到加價壓力冇咁大，因為平，又會有更多人入會。
另一令到Costco特別平嘅原因就係，平均每個倉嘅庫存只有4,000種不同產品，相對其他超市有超過30,000種， Walmart（WMT）SuperCenters有142,000種，Costco係特別少選擇，即係每樣都買大批貨，然後賺規模效應。
另一個比較成功嘅策略就係Costco嘅員工人工係特別高，平均高過Target（TGT）同埋沃爾瑪時薪2美元至到4美元，管理層話用嚟抵銷離職以及培訓成本，對員工好，亦有效防止員工偷嘢。當然除此之外仲有其他醫療保險、股份購買計劃等等去保留員工。你亦都好容易搵到台灣嘅一啲報道去讚好市多係筍工。
再放大少少睇，唔係淨係Costco，現有嘅超市仍然生存到，其中一個原因就係超市只係一個散貨場，基本上係賣緊自家品牌，好似香港見到嘅「百X牌」一樣，Costco都有自己嘅Kirkland牌，即係邊間公司啲貨好賣，就自己開一條line去賣，垂直一條龍去對抗阿馬遜網購。
畢菲特收購Mrs B嘅內布拉斯加傢俬賣場，因為佢欣賞Miss B嘅經營理念，Miss B講過，佢啲賣場開喺好偏僻嘅地方，但係只要夠平，啲人山長水遠都會去幫襯。Costco又係另一個例子。
高明
facebook：https://www.facebook.com/bigricetea
IG：https://www.instagram.com/koming.usstocks/
作者簡介︰賺錢係目標，炒股係手段，專欄記載由手段到目標嘅過程。
本欄逢周三刊出
笑到最後 - 高明 舊文
本文作轉載及備份之用 來源 source: http://hk.finance.yahoo.com
