【平民投資教室】錢俊：美元穩定幣都脫鉤 港元仲頂到嗎？
平民投資教室
日期：2022-05-17
更新時間：08:16:43
上周港美股市波動，都唔及加密貨幣恐慌嚟得恐怖。市值第十大嘅加密貨幣兼第三大穩定幣 TerraUSD （UST），原本主張以美元掛鉤，價格維持 1 美元，但上周
四一度跌至 0.12 美元附近，即係損手88%。其他主流加密貨幣如比特幣、以太坊等都跌兩成以上。
早前好多加密貨幣平台都有開戶優惠，聲稱穩定幣存款可享10%以上，當中以UST最為常見同高息，活期利息可達20%。而家馬後炮睇返，世上真係無免費午餐。
綜合資料，UST基本上無實貨支撐，只係發行商靠佢同另一隻自家加密貨幣Terra LUNA設立互換機制，容許任何時間以一美元價值嘅LUNA幣互換成一UST嘅套戥方式存在。然而市況動盪，賣盤遠多於買盤，愈跌愈多人賣，惡性循環下亦終要脫鉤。LUNA幣更大幅貶值，高位跌99.9%。
錢俊唔係加密貨幣專家，但今次幣災提醒投資者，宜做多啲功課了解投資產品係乜。唔好淨係見到保本或安全加埋高息幾隻字就覺得無問題，2008年雷曼迷利債券事件已可見一班。
雖然錢俊認為加密貨幣屬可投資嘅產品，但仍不宜瞓身只宜短炒，諸如比特幣及以太坊，相對其他傳統資產類別如股債，波動性相當大，入錯位走唔切就無仇報。就算係穩定幣，縱然部份聲稱有1:1美元資產支撐，但由於不受監管機構管轄，真確性未能認證，加上交易量較其他傳統資產低，若果遇上國際炒家空群出動，1:1美元資產能否足夠捍衛匯率？大家只能食花生等睇戲。
3053：港元貨幣市場成避風港
同樣喺上星期，港匯轉弱至一美元兌7.85，三年來首次觸發金管局第一次承接沽盤買入港元，惹嚟貶值疑雲。到底港元會唔會有機會跌到同UST一樣除時變廢紙？
錢俊認為機會仍然好微。大家都知香港有龐大外匯儲備。根據本月初金管局資料，外匯儲備超過4,600億美元，相當於香港流通貨幣約六倍之多。即係全部人賣港元，都仲要再槓桿幾倍先有機會炒冧港元。
南方東英港元貨幣市場ETF（HKG:3053）為首隻香港上市投資港元貨幣市場嘅ETF，於2018年上市，以三個月香港銀行同業拆息（HIBOR）為目標。超過80%資產都喺三個月內到期嘅港元計價同結算存款、存款證及債務證券。
翻查資料，當年公司標榜扣除每年0.3%管理費，ETF年收益率可達為1.5%。然而睇返近年表現，過去3年累積回報都只有2.3%。呢個好大程度上歸咎於疫情後嘅長期低息環境。2018年ETF上市時三個月HIBOR達1.8%，到上周五只有0.8%，扣埋管理費年回報得返0.5%。
咁你話咁低回報買嚟做乜？依家環球股債一齊跌，唔輸已經叻。同時如果你有筆錢想等待機會入市撈底，又唔想做定期存款鎖死資金，可以選擇泊入貨幣基金ETF，好過放落近乎零息嘅活期存款，時機到時賣咗一兩日就有資金回籠再出擊。最大問題係一手入場費要一百多萬港元，或者足以令唔少散戶卻步。
想聽其他投資Topic？話我知：chinjun.column@gmail.com
FB: chinjun.etf
IG: chinjun.column
以上觀點僅為個人分析，並不構成任何投資建議。
平民投資教室 - 錢俊 舊文
本文作轉載及備份之用 來源 source: http://hksmedia.com
