操盤手劄記│收息股防守力點秤？（割柑人）
操盤手劄記│收息股防守力點秤？（割柑人）
公用股下跌，主要受到盈利下跌影響，投資者擔心盈利下跌有損派息能力。
棄械投降？美銀引述資金流向監測機構EPFR Global數據指出，截至上周三止一周，環球股票基金流走168億美元，9周以嚟最多，美
股基金流走174億美元，7周以嚟首次走資，反映投資者喺經濟衰退風險加劇下，正在逃離股市。資金流入現金、黃金等避險市場，期內債券基金贖回額為235億美元，投資者將108億美元轉持現金，6億美元轉投黃金。不過，今年以嚟，投資者累計買入1,950億美元股票，沽出1,930億美元債券，反映投降嘅唔係股市而係債市，意味股市仍未見底！
美股、外匯、加密貨幣免費即時報價，自選投資組合獲取相關新聞提示。
環球通脹升溫，央行加息遏制，引發滯脹、衰退風險，就連美國聯儲局主席鮑威爾上周都終於話：「衰退係有可能」。經濟景氣轉差，企業盈利亦會轉差。美銀、大摩、法興等多間大行預計，美股標指將會跌至3000點先至見底。不過，上周美股喺超賣下反彈，擺脫連續3周嘅跌勢，上周五道指收31500，升2.7%；標指收3911，升3.1%；納指收11607，升3.3%。
煤氣中電令神話破滅
港股方面，外圍風高浪急，內地股市成為股海燈塔。恒指上周五收21719，升2.1%；夜期高水62點；ADR恒指比例指數高水83點。走勢上，恒指突破近兩周橫行區20700至21500，直搗100天線21700水平，短期可望上試三角形頂22000水平，然後係4月初高位22500水平。不過，喺走資情況下，小心有暗湧。近期港股偏向睇A股頭，而A股指數中，滬深300指數同恒指今年走勢關聯度達81%，有助預測港股。
股市有驚喜亦有驚嚇，被視為穩陣收息股嘅公用股，繼煤氣（003）早前因唔送紅股而大跌後，上周輪到中電（002）因澳洲電廠炒燶「期電」發盈警而大跌，而且盈警、火警相繼而來，元朗電纜橋起火引致3區停電，未來或需為受影響者提供補償，潛在開支增加或令今年盈利前景惡化。公用股「有升有息」神話破滅，仲有冇穩陣收息股可揀？
股息率起碼要逾6厘
公用股下跌，主要受到盈利下跌影響，投資者擔心盈利下跌有損派息能力，引發沽壓。不過，本港公用股嘅本地業務其實做得唔錯，只係受到外地投資拖累；此外，本港公用股係收港元，而港元同美元掛鈎，喺美息趨升、美元呈強下，相對穩陣。惟要留意，買公用股收息，唔係有股息就有防守力，當無風險收益如美國10年期債息都逾3厘，起碼要揀持續派息逾6厘嘅股份。
收息股中，電訊股業務少受經濟周期影響，盈利相對穩定，現金流強勁，派息亦穩定，股息率較高，防守力較強。以本地薑香港電訊（6823）為例，2012年至2021年，全年派息都相當於全數經調整資金流，2021年派息亦增加2.4%，該股現價股息率6.9厘。若嫌防守力未夠，可考慮三大中資電訊股，三者喺派息「鬥增」下，股息增幅更大，股息率更高，有7.2至8.3厘。
割柑人
曾任財經記者、編輯，在本港報章撰寫財經專欄逾十年
www.fb.com/hkstockpicker
本欄逢周一刊出
操盤手札記 - 割柑人 舊文
本文作轉載及備份之用 來源 source: http://hk.finance.yahoo.com
