【天下第一倉】高山行: 追番些少都夠爆
天下第一倉
日期：2022-07-06
更新時間：08:42:00
內房股之前重創，不少怪象頻生，其中佳源國際(2768.HK)更是年盈利高過市值，只係基於內房債務事件影響而打落無情低位，最新進展是兩份清盤呈請已被駁回，股價大成交初彈，點都有咁上
下後勁跟尾，現位仍係超級好價！
2768在2016年初以每股2.48元招股上市，最高曾經做過十幾皮，主業在江蘇省開發及銷售住宅及商用物業，並向政府機構就開發安置房及開發或翻新其他類型物業、設施或基建項目提供服務（包括負責聯繫建築承包商及設計公司）。
不過，隨著近年內房爆煲事件，亦令這隻過氣股王打落低位，昨日初彈後仍只做0.475元，相對5.35元nav，係咪夠曬震撼？仍未算，再睇業績記錄更是嚇人，去年盈利24.2億元人仔，現市值只得23.5億元，意即市值只相當於去年盈利九折，雖則2021年度冇派息，但2020年則派過每股15仙人仔，睇番現價，又係令人目瞪口呆！
最新正面消息，是兩份清盤呈請已被撤回，另上月中剛向包括董事局成員在內的130名選定合資格人士授出1.31億份購股權，佔擴股後2.57%，每股行使價0.38元，相對現價，又係糧草先行式啟示。
資本動作方面，過去幾年每股發行取價令人嘆為觀止，分別由3.3至14.18元不等，去年應佔溢利降28.4%亦可幸24.2億人仔，去年底止擁土地儲備總建築面積達1,743萬平米，一切數據都係大發展商級數，係時間追番應有身價啦啩！
高山行
天下第一倉 - 高山行 舊文
本文作轉載及備份之用 來源 source: http://hksmedia.com
