操盤手劄記│儲局誤踩CPI滯後陷阱？（割柑人）
操盤手劄記│儲局誤踩CPI滯後陷阱？（割柑人）
美國9月CPI按月升0.4%、按年升8.2%。
股債滙又三殺！美國9月CPI按月升0.4%、按年升8.2%；剔除能源同食品嘅核心CPI按月升0.6%、按年升6.6%，40年嚟最高。通脹
數據全線高過預期，反映聯儲局3月以嚟加息3厘未能撳低通脹。市場已price in儲局11月議息將再加息0.75厘，並正price in 12月又再加息0.75厘。上周五美滙指數重越113，非美貨幣難逃一跌；美債2年期、3年期債息突破4.5厘收市，10年期債息突破4厘收市；美股道指、標指、納指分別跌1.3%、2.4%、3.1%，金龍中國指數跌3.9%，港股ADR比例指數低水1.3%。
美股外幣即時報價 多國新聞任睇
值得注意嘅係，美股上周四喺通脹數據出爐後不跌反升，上演大奇蹟日，係技術反彈？係挾淡倉？定係押注通脹見頂？CPI作為通脹指標，確係有所滯後，以租金為例，CPI顯示按年升6.6%破頂，但據網上房地產經紀Redfin數據，9月全美租金中位數按年增速已降至13個月嚟最慢。此外，CPI顯示食品價格按年升11.2%，但據聯合國糧農組織數據，9月全球食品價格指數已連跌6個月。儲局有冇錯判通脹未知，但加息將令美國政府2023財年債務利息支出飆至近5,800億美元！
美提早拆彈 防英式爆雷
債務利息支出大增，儲局會否投降？儲局首務是遏制通脹，債務事宜歸財政部。喺英國國債危機後，美國財政部嘅著眼點喺國債舊債交易流通性不足問題，而非債務利息支出。上周五財政部就詢問交易商，政府需否回購國債舊債改善債市流動性，似乎打算提早拆彈，以防爆發英式金融危機。據富瑞貨幣市場經濟師Thomas Simons解畫，該方案並非QE或QT，而係探索可以點做。
講返儲局加息遏制通脹，現時全球緊盯儲局政策動向，皆因美國加息收水，一來令資金成本增加，二來令美元滙價上升，環球資金流向美國，各地資金抽乾，經濟下滑、股市下跌。隨著美滙指數重越113，英鎊兌美元低見1.1151，兌掛鈎美元嘅港元低見8.7535；日圓兌1美元低見148.88，係32年低位，每百日圓兌港元低見5.2734。美元持續上揚，花旗認為係「最安全的藏身之處」。
若買收息股 揀6厘以上
雖然港元掛鈎美元，但美元強勢，港元相對弱勢，上周三、四、六，港元都曾觸及7.85兌1美元弱方兌換保證，金管局分別承接10.21億、116.97億、25.91億港元沽盤，銀行體系結餘降至1,040.14億港元。由5月起，金管局已37度接錢共2,342.7億港元。資金流出港元，港股冇運行，上周五雖然喺連跌6日後反彈，但午市由高位回調三分二，17000關得而復失，收16587，即市高位17028成後市阻力。
升市，risk on；跌市，risk off。難怪現時唔少股民由投資轉理財，一來保本為上，二來定期存款都有3至4厘息。想要更高回報，較穩陣係揀6厘以上嘅收息股如公用股。香港公用股嘅信貸評級普遍為「A」，被視為無風險資產嘅美國10年期國債則為「AAA」，觀乎過往數據，前者股息率比後者孳息率平均高1.5個百分點，故現時買公用股，股息率起碼要逾5.5厘，計及美國加息未完，更要逾6厘先值博。
割柑人
曾任財經記者、編輯，在本港報章撰寫財經專欄逾十年
www.fb.com/hkstockpicker
本欄逢周一刊出
操盤手札記 - 割柑人 舊文
本文作轉載及備份之用 來源 source: http://hk.finance.yahoo.com
