操盤手劄記│香港通脹被低估？（割柑人）
操盤手劄記│香港通脹被低估？（割柑人）
本港CPI假設所有住戶都係租客或供樓業主，因此住屋成本佔比最大，高達四成。
踏入第四季，先睇返第三季季結，上周五港股收17222，升0.3%；全季埋單則跌21.2%，熊霸全球，兼連跌五季，追平2008年
至2009年金融海嘯期間所創最長跌浪紀錄！港股已連續三周陰燭下跌，近日守17000關，本周不排除會失守，但睇日線、周線、月線RSI都見超賣，亦不排除會技術反彈，先上望9月22日下跌裂口18195，若彈完散，則將下試16000關，即1998年以嚟嘅上升軌同2011年10月谷底16170附近。
美股外幣即時報價 多國新聞任睇
外圍方面，上周五美股開市前，美國商務部公布8月個人消費支出（PCE）物價指數按年升6.2%、按月升0.3%；剔除能源同食品後，核心PCE按年升4.9%、按月升0.6%，都高過預期，反映聯儲局連續三次重手加息0.75厘，對遏制通脹效力未如預期。利率期貨顯示，儲局下月再重手加息0.75厘機率升至56.5%。美股道指、標指、納指分別跌1.7%、1.5%、1.5%；全季埋單則分別跌6.7%、5.3%、4.1%，都已連跌三季。
美歐通脹相繼破頂
通脹、加息、衰退風險上升、風險資產下跌，係全球面對嘅問題。上周五歐盟統計局公布9月消費物價指數（CPI）初值，歐元區按年升10%、按月升1.2%，都高過預期，兼係有紀錄以嚟年率首見雙位數。此前一日，歐元區以至歐盟最大經濟體德國，已公布9月CPI初值按年升10%、按月升1.9%，都高過預期，兼係1951年以嚟年率首見雙位數。市場預計，歐洲央行10月議息將再加息0.75厘。
多國CPI按年升幅近幾個月相繼創下多年新高——美國創40年新高、英國創40年新高、德國創71年新高，就連長期低通脹嘅日本，8月CPI亦按年升3%，創31年新高。香港又點？8月CPI按年升1.9%。點解喺聯繫滙率下，香港通脹唔似美國咁高（美國8月CPI按年升8.3%）？皆因兩地編制CPI嘅項目、比重唔同，例如美國地方大，出入普遍靠揸車，能源同交通佔CPI比重約兩成；香港地方細，出入唔使靠揸車，相關佔比只約9%。
港元被強勢非好事
值得注意嘅係，本港CPI假設所有住戶都係租客或供樓業主，因此住屋成本佔比最大，高達四成，而由於喺疫情下租金回落，拖低整體CPI，因此未能全面反映現實。市場亦質疑本港過往嘅CPI計算都低估市民生活成本，因為住屋開支佔比最大，但計算方法係用租金而唔係用樓價。點解？經濟師將樓價剔出CPI嘅理據：一來樓價比較波動，會令CPI大上大落；二來買樓可能一世人一次，亦可能係投資，並非日常消費。
雖然香港通脹唔似美國咁高，但美國加息遏制通脹，喺聯繫滙率下，一方面，香港因應港美息差，始終要跟隨美國加息；另一方面，美國加息，美元強勢，港元同美元掛鈎，港元亦「被強勢」，但表面風光，內裏陰乾。香港並非通脹高企，亦非經濟過熱，跟隨加息會犧牲經濟增長；而港元被強勢，外資來港變得「較貴」，會寧願揀「較平」嘅東南亞市場投資，甚至揀日本、英國等地。
割柑人
曾任財經記者、編輯，在本港報章撰寫財經專欄逾十年
www.fb.com/hkstockpicker
本欄逢周一刊出
操盤手札記 - 割柑人 舊文
本文作轉載及備份之用 來源 source: http://hk.finance.yahoo.com
