笑到最後｜三招救港留港消費（高明）
笑到最後｜三招救港留港消費（高明）
陳茂波呼籲市民留港消費，保基層就業。
自從本欄先寫「恒指三萬點」，再寫「美股大反彈」，短時間內令港股及美股悲觀情緒掃除，再一次證明本欄往往都先過市場。最近，香港財政司司長陳茂波講未來經濟及預算，提及希望香港人去完
旅行之後，呼籲市民留港消費，保基層就業。既然又係呢啲艱難時刻，本欄又係時候出招救市。
美股外幣即時報價 多國新聞任睇
一、留港消費扣稅
一般抽公司稅係扣完開支按純利Bottom Line去抽，打工就直接抽收入Top Line，本來由來已久亦冇乜爭議，所以冇乜必要改。既然現時有政策目標，索性將打工仔嘅薪俸稅可扣哂生活開支每月淨賺嗰筆先計稅，例如港鐵（066）會甩門，正常人都會驚，買架車返工都合理，買車嘅費用可以扣稅；又例如份工要WFH，住屋就係返工嘅開支，買樓嘅開支扣稅都合情合理。打工仔為咗抽少啲稅，一定會瘋狂本地消費，出幾多糧使幾多，一定立即刺激消費。
二、步行里數
香港人之所以成日諗住飛去旅行，其中一個原因就係航空公司及信用卡公司長期透過飛行里數渲染，碌卡換里數，一放假換機票就走。此風不可長，政府亦應推出「步行里數」抗衡「飛行里數」霸權。
反正政府已表明安心出行可以追蹤，直頭加入步行里數功能，喺香港行街越多換越多里數，香港係商場之都，行行嚇就有需求，無事出街少破財嘛。並且因為現時立法修例容易，所以可以修例，要求所有政府發牌機構接受里數換產品或服務，最初由水電煤及公共交通工具開始，市民換領步行里數嘅誘因又大增。
三、買股票賺現金回贈
每次香港出現消費泡沫，背後一定係同股市泡沫有關，始終樓好難短炒同搣一忽嚟食，股票可以一手手沽，賺到錢收市即刻去威，等唔切去日本咁遠！港股雖然反彈但仍然低迷，直接影響消費。政府可以立法規定銀行按交易額現金回贈，谷高成交從而打旺個場，從而吸引外國投資者，從而港股重上三萬點，從而本地消費增加。
美國中期選舉剛過，似乎兩黨各自控制一個議院，未來至少兩年美國立法會好困難；相反，香港立法就好容易，而要市民留港消費，簡單立法就做得到，難得美國自綁雙手，優惠時間太短，出手要更大！
高明
facebook：https://www.facebook.com/bigricetea
IG：https://www.instagram.com/koming.usstocks/
作者簡介︰賺錢係目標，炒股係手段，專欄記載由手段到目標嘅過程。
本欄逢周三刊出
笑到最後 - 高明 舊文
本文作轉載及備份之用 來源 source: http://hk.finance.yahoo.com
