如果完全按照預期行，加息到5月見頂至5厘至5.25厘，之後6月就開始進入減息周期。
矽谷銀行（SIVB）等一眾銀行被聯邦存款保險公司FDIC接管，大致原因都係資不抵債出現擠提，每次出現低息，一定有銀行追求更高回報，而提升風險，到加息後爆破，每次美國都有份，只爭在大定係細。
美股外幣即時
報價 多國新聞任睇
所謂唔爆都爆咗，市場反應係，對已經發生嘅時事完全冇興趣，反而白事當紅事，最新開始憧憬停止加息，以至減息。利率期貨顯示，3月22日議息會加0.25厘嘅機會已經升至81%，較之前鮑威爾「睇嚇點」言論後一度加0.5厘多過0.25厘嘅預期已經縮水。如果完全按照預期行，加息到5月見頂至5厘至5.25厘，之後6月就開始進入減息周期。
預測未來要睇歷史
比較進取嘅直頭話減息，其中野村話聯儲局可能在下周議息會議上減息並暫停縮減資產負責表。如果聯儲局純粹要打救金融體系，避免出現信貸緊縮，繼而蔓延擠提，直接減息更加合理，預期之中再拖多兩個月合共加0.5厘，之後先施施然減息救市，彷彿連預期都覺得矽谷銀行等一眾銀行太濕碎，由得佢攤凍，等加息壓制咗通脹率，然後再減息預防7月打後嘅更大危機。
要預測未來，就要走入歷史。高通脹、經濟衰退，以前唔係未試過。參考1979年至1987年聯儲局主席Paul Volcker年代嘅美國經濟，就有啲似，在70年代尾同80年代初期，美國經濟面臨高通脹和高失業，因為越南戰爭同石油危機等因素導致物價上漲。同依家肺炎、俄烏戰爭、短暫嘅能源危機都好接近。
比起今日3.6%嘅低失業，79年大約6%。1980年CPI增長達13.5%，79年至81年連續三年雙位數增長，聯儲局雙重目標擴大就業、穩定物價，Paul Volcker嘅兩難更加明顯，但佢反而推行一系列緊縮貨幣政策，被稱為「Volcker Shock」，聯邦目標利率由1979年11%上升到1981年20%嘅紀錄高位，失業率則在1982年達到10.8%的高峰。79至82年，標普指數浮浮沉沉，直到82年底通脹正式受控，並且目標利率回落至10厘以下，美股就開始漫長牛市，直至87年黑色星期五股災終結呢個周期。
當然，Paul Volcker任期初期銀行倒閉數量較少，聯儲局資料顯示，加息初期79至80年每年銀行只係執10間樓下，到85年先破百，89年531間執笠成為紀錄。但加息周期中主要係拉丁美洲債務危機，由美國加息篤爆。今次就突如其來要考慮多樣金融體系穩定。
聯儲局嘅初心雙重標（Dual Mandate），就係保就業同穩價格，今日鮑烕爾面對低失業環境，佢只須面對通脹，銀行出事前佢重申2%通脹率，再參考Paul Volcker為咗穩價格，犧牲咗就業，失業率達一成佢都未使落台。值得一提不論係雙目標定三大任務（雙目標+調控長期利率），都冇一項係股市升。如果佢真係勿忘初心，矽谷銀行執笠引發失業，咪係壓通脹嘅成果囉。
大家喺股市浮沉，好回味特朗普嗰4年推股，並且股災都救返生，仲要升到癲。但係過去三年經歷過嘅事，不禁令人諗多諗，咁快又減息推股價逼人發達，呢個世界如果有咁美好，就真係好正。
議息會只係爭一個禮拜，如果減息周期重現，升幅可以用年計，唔爭在等埋呢7日啦。
高明
facebook：https://www.facebook.com/bigricetea
IG：https://www.instagram.com/koming.usstocks/
作者簡介︰賺錢係目標，炒股係手段，專欄記載由手段到目標嘅過程。
本欄逢周三刊出
笑到最後 - 高明 舊文
本文作轉載及備份之用 來源 source: http://hk.finance.yahoo.com
