笑到最後 - 高明 2023年3月1日
今年返嚟美股一輪升幅後開始回落，自不然會令人覺得股票已死。
2022年係股災年，除咗高增長股動輒下跌七成以上，就算係一哥蘋果（AAPL），2022年高低跌幅達31.89%，2020年肺疫疫情初期，都只係跌35.15%，舊年由加息周期帶動嘅漫長跌幅，更加係消磨意志，對股票本身嘅信心產生動搖。
美股外幣即時報價 多國新聞任睇
所以今年返嚟美股一輪升幅後開始回落，自不然會令人覺得股票已死，定存當立。喺市場茫然之際，本欄又要穩住大家信心，話畀大家知擔心只係多餘，今年美股必定係升市年，毋須要諗太多。
主宰股價首先係睇息口走勢。當然，完全加曬就未係嘅，利率期貨反映仲有多三次0.25厘加息，再細心一睇，大約舊年12月，利率封頂位係5厘至5.25厘，現時睇已經增加至5.25厘至5.5厘，市場都覺得要加得更多。
望見終點令預期提升
但係預期係一件古靈精怪嘅事，息繼續加，但望見終點又會令預期提升，提前反彈。舉例來講，美股係12月中見底，見底原因就係聯儲局終於只係加息0.5來，扭轉2022年6月打後議息會連續四次加0.75厘，之後係點，大家睇股市就有眼睇。用相同嘅衝勁去推斷，現時估計今年6月14號加最後一次0.25呢，就係今個加息周期最後一次加息，好大機會今年嘅升勢起步位，就係由嗰一點開始。
AI崛起印證新意念仍然由美國輸出。正如大家所知，現時美股成為霸權嘅龍頭科技企業，除咗創業家嘅實力之外，更重要係來自美國。追溯YouTube最初未被Google（GOOGL）收購前，仍然係短片分享年代，其他第三世界國家一樣有人諗到網上影片分享係大趨勢，因為唔係美國，所以唔少有類似意念嘅人都因版權問題而無法成就大業，雖然美國都有人被告，但最終結果就係成就到YouTube，然後因為有美國帶頭，其他國家先將呢件事由要拉要鎖改為視作經濟動力。
今浪OpenAI嘅Chatbot再一次證明，帶頭都係靠美帝。即使霸權如Alphabet（Google母公司）被摧毀價值，整個美帝創造霸權嘅產業鏈並冇轉變，正如上星期所講，世界已經過咗幾個5361;仔車房整件巨無霸出嚟嘅時代，巨頭對巨頭就係未來，反而鞏固咗現有霸權嘅地位，微軟通過OpenAI合作再次受捧，難保未來蘋果（AAPL）及Alphabet都買另一啲新晉企業增強實力，未來有一段長時間都要接受本多終勝嘅殘酷現實。
高明
facebook：https://www.facebook.com/bigricetea
IG：https://www.instagram.com/koming.usstocks/
作者簡介︰賺錢係目標，炒股係手段，專欄記載由手段到目標嘅過程。
本欄逢周三刊出
笑到最後 - 高明 舊文
本文作轉載及備份之用 來源 source: http://hk.finance.yahoo.com
