【平民投資教室】錢俊：買高息股如何避免「財息兼失」
平民投資教室
日期：2023-04-18
更新時間：09:25:57
香港散戶其中一個喜好就係高息股。股價跌咗無有怕，最緊要有息派，過多幾年派息都補返本金蝕咗條數咁話。當然高息股在於，當公司財政出現問題，宣佈減派息甚至唔派息，股價就
會插水，投資者就真係「財息兼失」。唔好以為好難，較近期可以話係過往以雙位數息率見稱嘅內房股，早前屍橫遍野情況應該有目共睹。
因此，錢俊都介紹過買收息股ETF都係一個可取方法。唔單止買一堆公司以分散個別公司風險，同時涵蓋多個唔同行業分散埋行業風險，相對穩陣。
3190：首隻滬深港高息ETF
香港市場入面都有幾隻高息股ETF選擇。當中富邦恒生滬深港(特選企業)高股息率指數ETF於上年七月上市，據稱為全港首隻覆蓋滬深港三地高息股嘅ETF，亦是本港首隻每季派息嘅高息股ETF，一手入場費為約2000蚊，每年管理費約0.6%。
基金喺恒生滬深港（特選企業）300指數中揀出30隻高息股，唔少都係散戶喜愛嘅高息藍籌紅籌股，十大持股包括中石化、中國聯通、中國神華等。以行業細分，金融業佔超過40%，而能源同電訊亦有各15%。
表現方面，年初至今已升18%，跑嬴無乜升跌嘅恆指，甚至比升8%嘅美股標指更好。同時，以現價計，過去兩次派息達年息率5.3%，真係做到「財息兼收」。雖然如此，由於基金上市少於一年，喺唔同股市周期嘅表現未有足夠參考數據，長遠是否嬴家暫時難以定奪。
事實上，隨著美國加息周期接近尾聲，環球科技股近期亦有所回勇，美股納指今年都已升17%。錢俊之前亦提及，高息股同時係價值股，其中一個特徵係通常來自傳統行業，業務上嘅發展空間唔多。相反，屬於增長股嘅科技股業務潛力無可限量，比如近日熱炒包括ChatGPT嘅AI文字生成平台，日後正式擴展開去對大眾生活影響或深遠，可能有如智能電話一樣成為各人生活必須品，因此商業價值無可估計。市好嗰陣，科技股唔派息都大把人投資，而且長遠俾到嘅總回報非派息股能及。比如Tesla咁，今日雖然與高位仍有距離，但相比過去5年仍升8倍之多。
再者，買股票收息涉及手續費，大部分銀行券商收費介乎股息總額嘅0.2%至0.5%，亦有最低收費15至30蚊不等，即係你一手買得少，除時食你幾十百分比嘅股息。基金仲要一年派4次息，聽落就好爽，但睇返每次被銀行券商扣除嘅費用都咪話唔甘。因此，長遠計喺投資組合上唔應該淨係買收息股，以免因小失大。
想聽其他投資Topic？話我知：chinjun.column@gmail.com
FB: chinjun.etf
IG: chinjun.column
以上觀點僅為個人分析，並不構成任何投資建議。
平民投資教室 - 錢俊 舊文
本文作轉載及備份之用 來源 source: http://hksmedia.com
