笑到最後 - 高明 2023年4月5日
市場認為聯儲局息口周期見頂，呢個陳述至少有兩個問題。
市場認為聯儲局息口周期見頂，呢個陳述至少有兩個問題，第一，「市場認為」主要係睇息口期貨反映嘅機會率，一個月都可以變三四次，例如上個月由-0.25厘到+0.5厘嘅預期都先後成為最高機會率，當中可能只係因為鮑威爾一句說話，或一粒CPI數字，非常動態。
美股外幣即時報價 多國新聞任睇
第二，見頂還見頂減息還減息兩回事唔好撈亂，因為利率不變都係一個選項。
返入正題，美元變成高息貨幣，其他正常先進國家都大致要跟加息。站喺一般平民角度，正常地方活期存款竟然可以有3厘以上，真係好多年未試過。
當利率接近零，投資冇咗重要嘅機會成本指標，大部份嘅買賣一係以憧憬嘅價值為根據，一係投機為主，幾年前好多人話價值投資已死，其實係真，此乃後話。
契媽基金堪憧憬
不過話唔可以講到咁盡，始終舊年開始嘅預期，長時間認為息口見頂價係5厘至5.5厘，依家就算加息未完，都同盡頭好接近。
一旦今次「動態市場預期」終於睇中，加到上5.25厘之後下一個月無厘頭減息返轉頭，從此每個月減息直至利率再度歸零，咁會發生咩事？
大家都知道近期嘅美股升幅，三月納指上升6.69%，主要升幅嚟自五隻巨無霸：蘋果（AAPL)、亞馬遜（AMZN）、微軟（MSFT）、Alphabet（GOOGL）、Tesla（TSLA），升幅分別為13.5%至9.5%，撇除呢五隻股份，納指升幅只係3.83%，只可以用普通嚟形容。
霸權股雖然係科技包裝，實際上係霸權屈機業務，象徵著市場都只係想穩中求勝，並唔想博。
如果減息周期開始，最大路會升嘅股份離唔開：高息股、美元債重股、高增長股。經歷最多次低息周期，當中以高增長股升幅最無上限，「人有多大膽、股有多大產。」
高增長股曾經被包裝成契媽股，兩大美股契媽：Cathie Wood及Nancy Pelosi分別會主動及被動醒啲好嘢畀大家，不過後者年紀較大隨時退休，唔做議員無需申報就冇好嘢醒大家。前者由契媽稱呼一路降級至辱罵稱呼，到最近已冇乜人提起，冇人提係股市好兆頭，一旦利率真係神奇下降至零，Cathie Wood旗下嘅基金係最賭得過。
高明
facebook：https://www.facebook.com/bigricetea
IG：https://www.instagram.com/koming.usstocks/
作者簡介︰賺錢係目標，炒股係手段，專欄記載由手段到目標嘅過程。
本欄逢周三刊出
笑到最後 - 高明 舊文
本文作轉載及備份之用 來源 source: http://hk.finance.yahoo.com
