阿里管理層喺分析員電話會議解畫，今次重組，對內係要提升營運效率同競爭力，對外係要釋放價值。
「讓全世界都知道我們的低調！」呢句電影《竊聽風雲3》嘅對白，用嚟形容阿里巴巴（9988）創辦人馬雲上周一現身杭州，翌日阿里宣布重組，都幾貼切。馬雲自從2020年10月24日喺外灘金融峰會批評中
國金融監管制度，引致原定當年11月5日滬港上市嘅螞蟻集團喺上市前兩日被監管機構煞停後，為人轉趨低調。近年馬雲曾被發現喺西班牙、荷蘭、日本等地現身，近期更傳出拒絕回國，直至上周一被杭州市民喺文一路隧道影到佢喺座駕嘅相，打破傳言。
美股外幣即時報價 多國新聞任睇
馬雲同阿里，喺衰多口同分拆螞蟻上市撻Q後都轉低調，但馬雲返歸，阿里翌日收市後宣布「1+6+N」改組，其下設立六大業務集團——阿里雲智能、淘寶天貓商業、本地生活、菜鳥、國際數字商業、大文娛，除咗起家嘅淘寶天貓商業呢瓣由阿里keep住，其餘五瓣都可分拆上市；隔日《彭博》爆料，菜鳥最快年底來港上市。連串舉動引起全世界注目，阿里港股上周三飆升12.2%，並連升3日累升19.2%；阿里美股亦連升3日累升20%，3日成交共227.13億美元（約1,783億港元）！
雲業務有錢賺 分拆要顧安全
阿里管理層喺分析員電話會議解畫，今次重組，對內係要提升營運效率同競爭力，對外係要釋放價值。釋放價值成為股價催化劑，但要注意，最賺錢嘅淘寶天貓商業業務唔會分拆。根據截至上年12月底止9個月嘅業績，六瓣業務只得中國商業業務（即淘寶天貓商業）同雲業務（即雲智能）係EBITA（除息稅攤銷前利潤）有錢賺，分別為1,463.75億人民幣、10.37億人民幣，其餘四瓣見紅，包括打響分拆頭炮嘅物流業務菜鳥。
點解分拆會由無錢賺嘅菜鳥響頭炮，而唔係有錢賺嘅雲業務？估計同網絡安全、數據安全有關。中國政府對網絡同數據安全極之重視，尤其阿里雲有大量政企機構採用，接觸大量機密數據，政府唔會隨便畀外資沾手。如果分拆阿里雲，相信上市過程會受監管部門嚴密跟進，就似當年螞蟻上市嘅過程咁。蝕錢嘅四瓣業務中，菜鳥蝕得最少，最接近收支平衡——本財年首9個月EBITA蝕7,200萬人民幣，相信因而雀屏中選。
阿里版ChatGPT 傳下周二亮相
大市陰晴不定，加上高息環境對融資成本構成壓力，分拆蝕錢業務上市，估計集資力度有限。據報菜鳥估值200億美元，係平定貴？中國速遞行業中，以市值計，三甲依次為順豐（深：002352）、中通快遞（2057）、京東物流（2618），按三者最新財報計，收入相對市值嘅市銷率分別為1倍、4.6倍、0.6倍（越低越吸引）；菜鳥按估值計，市銷率為2.6倍。順帶一提，阿里持有8.9%中通快遞，並持有20.12%圓通速遞（滬：600233）。
阿里上周炒分拆重估連升3日後，踏入本周，4月開局即告回吐，連跌兩日累跌4.7%，失守50天線。分拆業務上市，估值好睇市況，不明朗因素多，仲要睇埋政策因素。阿里炒完未？以消息角度睇，阿里下周二喺北京舉行阿里雲峰會，據內地媒體報道，阿里將於當日發布AI大模型，並於4月18日推出行業應用類模型。近日有blogger測試天貓精靈（AliGenie），發現已接入GPT-4，生成阿里版ChatGPT語音助手，睇嚟又有得炒消息。
割柑人
www.fb.com/hkstockpicker
本欄逢周四刊出
操盤手札記 - 割柑人 舊文
本文作轉載及備份之用 來源 source: http://hk.finance.yahoo.com
