本港上市嘅國際金融股，亦有類似「中國特色估值體系」股份，例如滙豐。
又到超級議息周！本周美歐日三大央行相繼議息，最受關注嘅係美國聯儲局加息步伐會否出現「鷹式暫停」（Hawkish Skip），本港時間今日淩晨2時揭盅，本文見報之時，讀者已知結果。喺揭盅前，美國周二公布嘅5月CPI繼
續放緩，成為風向儀，利率期貨顯示，今次凍息機會近100%，但下月再加息機會近70%。至於下半年會否減息，觀乎核心CPI按月仍升0.4%，唔再加都偷笑，莫講話減；若然要減，則代表經濟唔掂，股市都冇運行！
美股外幣即時報價 多國新聞任睇
全球第一大經濟體美國，加息欲斷難斷；第二大經濟體中國，則因經濟復甦疲弱，《彭博》周二引述消息稱，中央考慮採取一攬子刺激措施，包括減息，以重振內房內需，國務院最快周五討論。同日，人民銀行提前下調7天逆回購利率（OMO），調低10基點至1.9厘，係2022年8月以嚟首次調整，兼係歷來最低；當晚，又喺美國CPI出爐前10分鐘，下調常備借貸便利利率（SLF）10基點。中美負利差擴大，人民幣離岸價跌穿7.17。
低估值高股息 如中特股
人民幣兌每美元離岸價、在岸價上月中先後「破七」，並持續貶值，今趟係2015年滙改以嚟第四次「破七」，此前曾喺2022年9月封城期間、2020年2月爆疫期間、2019年8月中美貿易戰期間試過，分別持續3至5個月。人民幣貶值不利港股，因恒指成分股三分二為中資股，收入以人民幣為主。港股昨日喺美國議息結果揭盅前反覆回軟，早段一度突破1月以嚟嘅下降軌19600水平，但企唔穩，收19408，跌0.6%，預料將繼續挑戰下降軌。
喺市場預計就算美國6月凍息，7月難免再加息下，息口敏感嘅國際金融股反覆造好，因金融股嘅利錢主要嚟自「食息」，無論係貸款定係持有債券，息口上升先有肉食。本港上市嘅國際金融股，亦有類似「中國特色估值體系」股份咁，以低估值、高股息著稱嘅股票，堪稱「香港特色估值」股票，例如港人向來有情意結、本港三大發鈔行之一嘅滙豐控股（005）。
派季息展回購 撐起滙豐
滙豐今年恢復派發季度股息，首季每股派0.1美元，可能會似疫情前咁，首三季派0.1美元，末季派0.21美元，全年共派0.51美元（約4港元）。滙豐現價60.05元，市帳率0.9倍，預測市盈率6倍，預測股息率7.4厘，可算低估值、高股息。滙豐恢復季息之餘，更重要係計劃回購最多20億美元股份，回購即係托價！錢從何來 ？預計嚟自出售海外業務。滙豐2月時講過，喺完成出售加拿大業務後，擬派特別股息0.21美元，餘額可作回購。
近期好多人將香港同新加坡比較，尤其3月公布全球金融中心指數排名，新加坡以一分之微贏香港，排名第三，「紐倫港」變「紐倫坡」。睇返新加坡金融業發展，當地最大銀行星展銀行（大股東係新加坡第二大主權基金淡馬錫），曾收購香港嘅廣安銀行、道亨銀行、海外信託銀行；第二大銀行華僑銀行，亦曾收購香港嘅永亨銀行，反映新加坡政府同金融界，都好重視香港呢個國際金融中心，認為有必要喺呢度插旗。
割柑人
www.fb.com/hkstockpicker
本欄逢周四刊出
操盤手札記 - 割柑人 舊文
本文作轉載及備份之用 來源 source: http://hk.finance.yahoo.com
