港股ETF自上年7月4日納入港股通買賣名單後，近月多番打入港股五大成交榜。
6月將盡，市場對7月充滿期待。港股5月由20000關跌落18000關，6月轉打19000關攻防戰，股市向來有「五窮六絕七翻身」之說，7月自然惹人憧憬。事實上，港股本周初已初步消化「中國未救市」、「中美關係未
破冰」等消息，恒指喺五連跌、五連陰後，技術性反彈又好，半年結粉飾又好，周二回升1.9%，重上19000關，昨日再升0.1%，收19172。人民幣滙價則反覆偏軟，離岸價跌穿7.25關。
美股外幣即時報價 多國新聞任睇
恒指初步升穿短期下降軌，重返19000關，觸底反彈格局。後市若能「過關斬線」——回補上周三下跌裂口19377至19504嘅關卡，並突破10天、20天、50天、250天線（現分別喺19402、19224、19551、19507）嘅阻力，先有望「七翻身」。後市有否動力，要睇中央救市政策同人民幣走勢；而指數能否飆升，就要睇ATM有幾給力，因四大內銀7月上旬除息，指數會被拖低，所以要睇權重股ATM有冇力「護價」。
大手買入後 再大手沽出
近月觀察北水流向，發現北水鍾意短炒港股指數ETF，包括追蹤恒生指數嘅盈富基金（2800）、追蹤恒生國企指數嘅恒生中國企業（2828）、追蹤恒生科技指數嘅南方恒生科技（3033）。港股ETF自上年7月4日納入港股通買賣名單後，近月多番打入港股五大成交榜，盈富昨日又登榜首。不過，有別於本地市場同國際市場普遍視ETF為中長線投資嘅操作，北水傾向短炒ETF，常見大手買入後再大手沽出。
以盈富為例，近月多次錄得過百億元成交，分別喺5月24日、25日，6月1日、5日、6日、16日、19日，錄得103.4億、105.6億、180.4億、121.8億、122.5億、165.8億、124.4億成交，以往甚為罕見。上述日子，盈富成交都超越兩大重磅藍籌騰訊（700）同阿里巴巴（9988）；單睇6月16日，三者都錄得過百億元成交，盈富仍以165.8億，跑贏阿里嘅161.3億同騰訊嘅129.5億，登成交榜之冠，而當日北水買賣盈富嘅成交達50億元。
北水買盈富 無槓桿沽空
北水愛炒港股指數ETF，點解？本港投資產品中，盈富基金、期指、期權、牛熊證等，都係買大市升跌嘅產品，分別只係槓桿水平有別，本港股民炒盈富可用孖展，炒期指、期權，只需支付按金即可；但北水想買大市升跌，現時只可買賣盈富，既無槓桿，又無沽空，換言之，睇好就買入，睇淡就沽出，無得借貨沽空，唔似得本港股民咁可以有其他操作。
睇本周一、二北水流向，已見北水典型操作。周一港股再跌0.5%，但港股通成交活躍股資金流向表現最好係盈富，錄得淨流入13.64億，另一隻國指ETF 2828亦錄得淨流入2.93億；周二港股反彈1.9%，港股通成交活躍股資金流向表現最差三位係盈富、國指ETF 2828、科指ETF 3033，分別錄得淨流出52.33億、21.13億、8.79億。由此睇嚟，北水操作傾向短炒，見好就收。順帶一提，當北水沽盈富，本港股民若對賭睇好大市，可孖展買入盈富，既較期貨易開倉，槓桿風險又較期貨低，亦無轉倉風險。
割柑人
www.fb.com/hkstockpicker
本欄逢周四刊出
操盤手札記 - 割柑人 舊文
本文作轉載及備份之用 來源 source: http://hk.finance.yahoo.com
