平民投資教室 - 錢俊 2023年8月31日

平民投資教室 - 錢俊 2023年8月31日


【平民投資教室】錢俊：糧食危與機
平民投資教室
日期：2023-08-30
更新時間：19:21:29
日本排放核廢水上周展開，大派港人趁倒水前食最後一次日本餐。日本餐廳就叫曬救命，擔心之後無人食之餘仲要煩喺邊度搵替代食材。另一邊廂，內地澳門等又出現搶鹽潮抗軸射。單一事件影響整個食物鏈。

近年全球食品價格波動比以往更強勁。遠至歐洲，俄烏戰事令兩個農產品大國出口受影響。俄羅斯被多國制裁之外，上月俄羅斯單方面暫停黑海穀物協議，令烏克蘭產品出入口受阻。此外，印度同月亦宣佈停止出口部分種類大米，唔少香港師奶已經對搶米蠢蠢欲動。

講返近啲，中國近月經歷北方水災，糧食成為其中需要解決嘅問題之一。中國作為世界上最大嘅小麥生產國，小麥亦係受近期天氣影響最大嘅農作物之一，今年產量已經下降20%以上。

站在投資角度，有升值潛力就有投資機會。就糧食嚟講，唔同買股票同債券話買就買，因為買糧食實貨你需要倉庫，而且要面對保質期，更加係你要諗放售點搵人同你買。因此投資市場就出現商品期貨，常見糧食期貨包括粟米、糖、大豆和小麥等。然而，買賣期貨對一般投資者嚟講唔容易。

TAGS：用ETF「積穀防饑」
期貨以外，美國投資市場亦有商品相關嘅ETF選擇，比如Teucrium Agricultural Fund（US:TAGS）。基金涉獵粟米、糖、大豆和小麥四大主要農產品投資。對一啲又想搏農產品升值但又唔知買邊種嘅投資者，可算是大包圍之選。同時唔需要開期貨孖展戶口，容易操作。

然而，買呢隻基金有幾點要注意。首先，基金雖然管理費只係0.13%，但實際佢係投資自家旗下四隻分別投資粟米、糖、大豆和小麥期貨嘅ETF，每隻管理費為約1.1%，亦即係有兩重收費，因此實際費用都唔少。其次，基金投資每隻ETF成份都頗為平均，若果自己睇好某啲種類，甚至睇好一啲呢四種以外嘅商品如大米、咖啡等，咁就最好自己分別投資，仲可以慳返0.13%管理費。

另外，TAGS買嗰四隻ETF都係期貨合約持倉，自然都要面對期貨合約相關風險，包括違約嘅對家風險，以及期貨合約換貨續期時出現嘅「順價差」（Contango）「逆價差」（Backwardation）現象，因此相對商品現貨價格或有誤差。

而且，商品價格由其係食品，同時面對包括地緣政治、天氣等風險，波動較大，加埋上述管理費同期貨嘅性質，投資商品ETF都係宜短炒忌長揸。

想聽其他投資Topic？話我知：chinjun.column@gmail.com

FB: chinjun.etf
IG: chinjun.column
以上觀點僅為個人分析，並不構成任何投資建議。

平民投資教室 - 錢俊 舊文

本文作轉載及備份之用 來源 source: http://hksmedia.com