美國商務部明確表示，Nvidia 4090系列只在商業和生產領域受限，而日常消費者使用仍然不受影響。
美國當局加強對晶片的出口限制，Nvidia（NVDA）回應，表示面對新措施，中國製造H800和A800晶片將受其影響。同時，高階顯示卡RTX 4090都喺受控名單上，包括埋香港同澳門
。不過，另有報導提及，美國商務部明確表示，4090系列只在商業和生產領域受限，而日常消費者使用仍然不受影響。
美股外幣即時報價 多國新聞任睇
先進嘅顯示卡晶片，較明確嘅使用方向係打機、AI人工智能，同埋自動駕駛。香港受到限制其實唔係壞事，正如ChatGPT剛推出時，大量網民指出ChatGPT唔識做家務及湊仔，所以冇用一樣。冇先進製程晶片，生命仍要繼續，仲可能有正面作用，以下細數五大對股市、對社會、對家庭好處：
職業司機有工開
1.人工智能概念已經存在好多年，甚至廿年前已有韋史密夫主演嘅智能叛變，比起未來戰士更集中講人工智能。港股遲唔炒，早唔炒，偏偏OpenAI出ChatGPT後先炒AI股，大方向大策略上畀人牽住鼻子走。世上有好多問題未解決，唔係淨係得人工智能。如果冇得輸入晶片，唔再跟人口水尾語言生成，換嚟專注解決其他更水深火熱嘅問題，對社會一定更值得。
2.承上，第一AI語言生成股本應係OpenAI，不過冇上市冇得炒。Nvidia晶片股第二變第一。另外，自動駕駛第一應為Tesla（TSLA），但又有車同其他業務，Mobileye上市就更直接。其他包括Arm（ARM）、微軟（MSFT）、Meta（META）、Alphabet（GOOGL）、C3ai.Inc（AI）等等，總算叫齊腳。港股嗰啲所謂AI股，正常智慧都知同AI語言生成概念有啲距離。事實上，港股長期跟美股概念炒，但係推出嘅產品都係次貨，亦係港股長期低迷主因。如果今次鼓起勇氣概念脫勾，自己概念自己炒，話唔定殺出一條血路。
3.香港家長谷細路讀書考試面試就人所共知，AI就係缺口，如果不幸畀香港細路接觸ChatGPT之類AI，一定會減少操練，練精學懶，所以AI發展受限制，配合香港學生人數減少，未來已經貴精不貴多，未來更加會精上加精。最衰消費層面唔禁，否則連打機都冇新顯示卡用。老實講，香港曾經有電競熱，但係邊會有家長畀小朋友職業打機，何況電競生涯仲短過足球員，減少高端晶片，香港家長可安心操卷操面試。
4.先進製程晶片另一個新興行業就係自動駕駛，用嚟分析路面狀況。當然消費品唔禁，未來全自動駕駛嘅汽車製成品有機會一樣可以進口，但係冇得自主研發。正如打疫苗時，好多人唔係國產唔打，普及度一定打折扣。本來有自動駕駛，正常都需要有車牌嘅人坐低負責，冇自動駕駛，唔使估估嚇，職業司機一定有工做。
5.近期香港嘅經濟發展方向係夜繽紛，賣燒賣魚旦估計冇使用過任何一粒先進製程晶片，除咗啲客用佢部iPhone打卡時會用到之外。所以，冇晶片，對日常生活冇影響之餘，仲可以減少使用社交媒體打卡，專注自己本業，職人精神都係咁嚟，可以預期如果有日禁埋智能電話，香港可以發展出大量職人品牌，以供上市之用。
其他好處例如「冇入口就可以自主研發」係必然發生嘅事，所以上面都唔再重覆。即使喺冇AI晶片嘅情況下，香港可能發展得更快，可以講完全冇影響，毋須擔心。
高明
facebook：https://www.facebook.com/bigricetea
IG：https://www.instagram.com/koming.usstocks/
作者簡介︰賺錢係目標，炒股係手段，專欄記載由手段到目標嘅過程。
本欄逢周六刊出
笑到最後 - 高明 舊文
本文作轉載及備份之用 來源 source: http://hk.finance.yahoo.com
