美國Visa及Mastercard宣佈同美國商戶代表達成和解協議，未來五年內降低信用卡交換費。 (2Ban via Getty Images)
3月26日，美國Visa（V）及Mastercard（MA）宣佈同美國商戶代表達成和解協議，未來五年內降低信用卡交換費，費率上限將提供大約300
億美元嘅短期刷卡費減免，至少在未來三年內，將每一位商家目前嘅刷卡費用降低四個基點。有關信用卡嘅訴訟已經持續廿年，終於劃上句號。
美股外幣即時報價 多國新聞任睇
信用卡都係一個會籍
廿年前美國商戶已經同信用卡公司打緊官司，如果外國用慣現金，無現金交易唔重要，點會理信用卡公司？
廿年前高明讀大學，入學其中一件事證明同中學有分別，就係即刻開張信用卡，從此唔使再用老豆張附屬卡。當然，事後證實用老豆張附屬比較好，但後生時要型，冇計。
之後隨住金融創新，越嚟越多信用卡換禮品、cashback，最後變咗「公廁卡」嘅飛行哩數卡。
高明諗好多正常香港80至90年代已經習慣咗無現金交易。上一級嘅無現金交易，就係馬會之類嘅會籍，畀張會員卡佢簽單，月尾自動轉帳。講到尾，Visa、萬事達，又或運通（AXP），其實都係一個會籍，可以享受若幹會員服務，總之記得月尾準時找卡數。
講到尾，Visa、萬事達，又或運通（AXP），其實都係一個會籍。 (NurPhoto via Getty Images)
Visa Mastercard跟到潮流
當然，更高級嘅會籍就係認得你個樣，陳生，入面請。臨走簽張單月尾找數，唔單止無現金交易，甚至連卡同手機呢啲咁俗氣嘅嘢都慳返，指嚇個鼻，食嘢同走得。
差唔多廿年前去美國，正常都會唱啲現金，嗰時本地銀行信用卡冇咁發達，學生出唔到海外交易免手續費嘅信用卡，大部份買嘢都係用美元，買幾次畀個同學話：「喺美國得毒販先用現金。」可見其實取笑人用現金由來已久。
不過，真正先進嘅並唔係個方法，而係背後嘅信用，肯畀你後數嘅權力，如果用QR code掃碼，背後都只係一張預付卡，QR Code日本發明，方法勉強先進過現金，但用嗰個人落後，因為冇乜信用可言。
最後，經歷幾代Visa同Mastercard都跟到信用卡、電子支付同虛擬貨幣嘅潮流，呢啲股長遠值得留意。
高明
IG
作者簡介︰賺錢係目標，炒股係手段，專欄記載由手段到目標嘅過程。
本欄逢周六刊出
笑到最後 - 高明 舊文
本文作轉載及備份之用 來源 source: http://hk.finance.yahoo.com
