特朗普暗殺事件，既改變美國大選選情，又改變環球數以萬億計資金流動。 (Bill Pugliano via Getty Images)
一粒子彈、一臉血斑，造就競逐回朝嘅美國前總統特朗普（Donald Trump）贏面大增；不過，國際社會對佢重返白宮不無憂慮，畢竟佢喺2017年1月至2021
年1月出任總統期間，盡顯右翼民粹主義同貿易保護主義本色，若果重掌政權，勢將逆轉現時部分外交政策。已屆94高齡嘅美國經濟學家、芝加哥經濟學派代表人物之一Thomas Sowell講過：「Politics is the art of making your selfish desires seem like national interests.」私扮成公，其實無論誰人掌政，大眾擔心嘅不外如是。
美股外幣即時報價 多國新聞任睇
特朗普回朝 貿易戰再嚟
7月13日，特朗普賓州遇襲見紅；7月16日，角逐連任嘅美國總統拜登（Joe Biden）喺黑人娛樂電視（BET）採訪時放風，若有健康問題，將會考慮退選，一改此前企硬唔會退選嘅口風；7月17日，白宮宣布，拜登再度感染新冠病毒；7月18日，新聞網站Axios引述民主黨消息，預料拜登最快周末宣布退選；7月19日，拜登反口唔會退選；7月21日下午（香港時間今晨），拜登宣布退選。拜登喺民主黨逼宮之下，不退不退還須退，畢竟特拜之爭，實際上係共和黨同民主黨打擂台！
唔少人覺得政治骯髒，不感興趣，避而不談；但政治影響日常生活，息息相關，避無可避。正如美國戰地記者、大文豪海明威（Ernest Hemingway）第三任妻子Martha Gellhorn話齋：「People often say, with pride, I'm not interested in politics. They might as well say, I'm not interested in my standard of living, my health, my job, my rights, my freedoms, my future or any future.」誠然，政治體現喺生活水平、健康、工作、權利、自由、未來⋯⋯等等之上；對投資者嚟講，更會著眼政經關係，因會影響投資策略。
廣告
上周五，美股三大指數跌0.7%至0.9%，道指已連跌兩日，標指、納指更已連跌3日；事實上，台股、日股亦連跌3日，都已失守上升軌。究其原因：①市場price in特朗普勝選，擔心貿易戰、晶片戰等戰情加劇；②市場加碼押注美國聯儲局9月減息，利率期貨顯示機率升至94%，導致美元轉跌，非美貨幣如日圓相對轉升，而日圓升值則引發環球拆倉潮，令環球資產市場尤其股市回落。
貿易戰當前 公用股穩陣
暗殺事件，既改變美國大選選情，又改變環球數以萬億計資金流動。其實事發之前，特朗普已有望勝選。根據民調，全國538張選舉人票中，佢所屬嘅共和黨篤定攞到251票，多過民主黨嘅226票，剩低嘅票嚟自5個搖擺州，佢大部分都領先，而暗殺事件嘅影響仍未反映。事發之後，根據Polymarket數據，佢勝選嘅機率由60%大升至71%。特朗普回朝，中美關係勢將惡化，中港股市難寄厚望。
其實特朗普是否回朝，中美關係都難以好轉。上周三，據彭博報道，拜登政府已通知盟友日本同荷蘭，若繼續向中國提供先進半導體技術，將祭出最嚴厲貿易限制。另外，上周四，特朗普作出五大當選承諾，包括推翻電動車政策，佢批評電動車有利中國同墨西哥，但損害美國汽車工人利益。中美貿易戰當前，據摩根大通分析2018年至2020年上一輪貿易戰，喺局勢嚴峻嘅三個時期，MSCI中國指數各類板塊表現，相對該指數，公用事業板塊表現最好，平均超出12.8%。市況不靖，揀股更要冷靜，可留意公用股。
割柑人
www.fb.com/hkstockpicker
本欄隔周一刊出
操盤手札記 - 割柑人 舊文
本文作轉載及備份之用 來源 source: http://hk.finance.yahoo.com
