國慶75周年臨近，中港股市上周先升為敬，賀國家牛一。 (traffic_analyzer via Getty Images)
世事無絕對，尤其係政策。明嘅，因時制宜！上周，中國連日出招救市，當中，人民銀行、金融監管總局、證監會聯合宣布「創設新的貨幣政策工具，支持股市穩定發展」，包括
：創設證券、基金、保險公司互換便利（准向央行抵押債券、股票ETF等以獲取資金投資股市）；創設股票回購、增持專案再貸款。另外，政治局拍板「要促進房地產市場止跌回穩」。前者一改自2006年以嚟嘅「嚴格禁止任何企業和個人挪用銀行信貸資金直接或間接進入股市」嘅準則；後者亦一改自2017年以嚟嘅「房住不炒」嘅準則。政策無絕對，諗起漫畫《聖鬥士星矢》都描述過，宇宙只得光速同絕對零度係絕對嘅！
美股外幣即時報價 多國新聞任睇
由anything but China變all-in, buy China
國慶75周年臨近，中港股市上周先升為敬，賀國家牛一。單睇港股，資金流入撈底，恍如牛一階段；但趁高獲利亦唔少。睇港股成交額，好有大時代feel：上周一（人行預告翌日有發布會），成交1,243億元；上周二（人行新招猶如印銀紙撐股市），成交2,424億元；上周三（上海率先宣布派消費券），成交2,548億元；上周四（政治局拍板救樓市），成交3,029億元；上周五（傳財政部擬發特別國債刺激消費及緩解地方債），成交4,457億元破紀錄！港股全周飆升2,373點或13%，收20632；10月夜期高水277點；ADR比例指數高水92點；追蹤美國上市中概股嘅金龍中國指數升4%。要留意係，恒指技術指標嚴重超買，短線有機回調。
今次政策市，可以炒幾耐？今次係炒救市，貨幣政策已經出場，跟住要睇財政政策，財政部再增發專項債？全面減稅降費？拭目以待！港股今輪升勢，始於美國啟動減息，疊加中國出招救市，環球熱錢流向估值較低市場，而中港股市估值係環球主要市場中最低，當中，港股2024年預測市盈率約9倍，遠低於日股嘅22倍、台股嘅18倍；外資、北水都見簇擁港股，港元資金需求上升，短期拆息抽升，港元滙價偏強，亦可佐證資金流入。券商普遍預計，港股估值修復行情，可延續至11月初美國大選前。上周之前，華爾街講緊嘅「ABC」係「anything but China」，上周變成「all-in, buy China」，華爾街「撈底王」、對沖基金大佬David Tepper都話「buy everything in China」，又係世事無絕對！
華爾街「撈底王」、對沖基金大佬David Tepper都話「buy everything in China」，又係世事無絕對！ (Perry Knotts via Getty Images)
政策扶持乳業 券商睇好蒙牛
本港上市嘅藍籌中資科網股如ATM——阿里巴巴（9988）、騰訊（700）、美團（3690），連日上升，高追風險亦高；「中特估」股份如四大內銀——建行（939）、工行（1398）、中行（3988）、農行（1288）則上周五大陰燭逆市回落，或因市場擔心寬鬆政策繼續超乎預期，令到盈利受壓，因而趁高急沽。炒救市要小心，除咗要睇政策，仲要睇值博率。
內地料有提振消費政策跟尾，有利內需消費股，當中，藍籌內需股蒙牛（2319）上周五曾急升25.2%，收升14.9%，報18.46元；惟以今年迄今計，仍累跌12.1%，係跌幅較大嘅內需股，具值博率，但升得太急，宜候回吐。上周四，內地7部門聯合印發《關於促進肉牛奶牛生產穩定發展的通知》，鼓勵地方通過發放消費券等方式拉動牛奶消費，以及推廣「學生飲用奶」等，里昂發表報告指措施有助短期內提振銷售，大和亦發表報告指有助加速供需正常化，兩行都睇好蒙牛。
割柑人
本欄隔周一刊出
操盤手札記 - 割柑人 舊文
本文作轉載及備份之用 來源 source: http://hk.finance.yahoo.com
