大師冇點你│香港人真係好有錢（李聲揚）
大師冇點你│香港人真係好有錢（李聲揚）
一年一度嘅瑞銀財富報告，結論當然係「香港人真係好有錢」。有邊隻字唔
明？每一年我都講幾次。搞笑在個個仲要講經濟唔好，香港人冇錢（當然啦下，有錢唔一定要消費，消費亦唔一定要在香港）。
下載Yahoo財經APP
美股外幣即時報價 多國新聞任睇
10個香港人 有一個係百萬美金富翁
首先，睇最吸睛嘅頭條。香港人平均身家60萬美金（大約470萬港紙），全球第三（瑞士69萬，美國62萬），排名同上一次一樣。
另外，每10個香港人，有一個係百萬富翁，美金嗰隻。留意計成年人口。
好啦，次次講完呢啲，總有一大堆無常識嘅人出嚟回。企圖反駁「香港人真係好有錢」呢個事實。
首先，梗有啲小朋友出嚟講，「計咗個個做樓奴未？樓價跌，個個爭銀行一大堆錢，負資產」。Excuse me，如果識英文嘅，可以搵返報告原文睇，有個字叫Methodology。入面清楚寫明，報告講嘅數字，「身家」「財富」，係計net（其實絶大多數報告都係，否則好兒戲）。Net worth，邊隻英文字唔識？就係你財富，減走負債。換句話講，供緊樓，當然要減返爭銀行嘅錢。負資產層樓1000萬但爭銀行2000萬嘅？唔好意思，冇份計你（除非你另外有幾億現金）。
當然，會有人問身家計唔計自住樓（記住減走負債），呢個就有質素嘅問題。有啲報告未必計，有啲計，呢個報告係計嘅。你心諗，扯！賣咗瞓街咩！但，啱呀！賣咗當然可以租屋，又或者可以瞓第五大街，瞓Oxford Street，你可以賣咗層樓移民，唔少人係咁，所以自住樓當然應該計。況且留意，即使樓價跌足N年，但香港人在呢個榜上依然排咁高。
當然仲有，每年都笑一次，但總有啲人拎「平均數」嚟大做文章，同你講「平均數冇意思」，「每個一平均一粒睪丸」，「我同李嘉誠平均每人幾百億身家」 — 不過首先呢，其他地方一樣係計平均數啫，人地一樣有非洲李嘉誠東歐李嘉誠，除非你話香港特別拉得高囉（答案：一半半）。
仲有，根本人哋個報告，有寫埋中位數，median。計中位數，香港人身家中位數22萬美金，全球都排到第四（盧森堡40萬，澳洲27萬，比利時25萬）。計中位數一樣勁。
當然了，理論上中位數可能比較反映「真實」，因為冇咗李嘉誠效應。而大家都知財富分佈必然側埋一邊，差不多所有地方嘅財富中位數，都係低過平均數。所以唔好見香港人中位數身家22萬美金，少過平均數（60萬）好多就大驚小怪。
中位數身家 絕對唔係李嘉誠拉高
的確，因為有李嘉誠效應，所以「平均數」比較反映最有錢嘅人（會拉高），但「中位數」就反映「富貴中產」（但都話10個有一個100萬美金身家），所以絕對唔係李嘉誠拉高。
咁嚟喇喎，香港人嘅平均身家，2024年升咗1.5%，但中位數身家，升咗2.1%！明顯見到係「富貴中產」財富增長。仲有，由2020年以嚟，香港人平均身家升2.7%，但中位數身家升5.9%！所以根本係好多人都好富貴！
至於點解香港人舊年財富有增長？固然港股做得好，美股都升。但香港樓價真係跌喎。咁點解香港人身家不跌反升？我未得閒細睇份報告（我估有講），但正常猜測當然係其他方面嘅增長（例如股票）多過樓價跌嘅錢。
諗真啲，有100萬美金身家嘅人，係咪真係樓佔佢身家大部份？我估未必。「至少本文作者唔係」。本文作者舊年嘅股票同其他身家進帳，絶對多過層樓跌價嘅銀碼。
去到超級富豪，更加唔使講，個個幾十幾百億身家，但總冇可能住層十億嘅樓，或者買幾十億樓返嚟收租（OK，梗有例外，唔好開名）。
最後，都話每十個成年香港人，就有一個係百萬美金富翁，講緊65萬人。最多係美國，2400萬個百萬富翁，但介紹返，美國3億人，肯定比例低過香港。中國有630萬個百萬富翁，但十幾億人。
當然有人同你講台灣好多有錢人，新加坡好多有錢人。介紹返，台灣百萬富翁，76萬人，多香港少少——但台灣人口係香港四倍咁滯。
最後，人人鍾意講嘅新加坡，好多資金流入，好多有錢人雲雲。新加坡嘅百萬富翁，33萬人，香港嘅一半，但人口只係少過香港少少。而再講一次，計平均身家（44萬vs 60萬）同中位數（11萬vs 22萬美金），新加坡人身家都少香港一大截。
好啦，結論，「香港人真係好有錢」，講完。但仲會有人要拗，話香港生活成本貴——呢個肯定係事實。但，宜居嘅地方，差不多必然係人工高洗費高身家高，好少掉轉。因為你覺得香港洗費貴，可以北上或去日本。但索馬里人啲錢就算當地好好洗都好，都好難買得起iPhone。
講咗咁耐都只係香港，其實份報告仲有好多嘢睇，但篇幅所限，呢度寫唔完。
李聲揚
前大行分析員，如今無業遊民，別人恐懼時我貪婪
FB Page︰meatbonetea金融肉骨茶
本欄逢周一刊出
大師冇點你 - 李聲揚 舊文
本文作轉載及備份之用 來源 source: http://hk.finance.yahoo.com
