操盤手劄記│我所看見的未來：富衛無息收（割柑人）
操盤手劄記│我所看見的未來：富衛無息收（割柑人）
剛過去嘅周末，日本並無如預言般發生大地震，但呢場「末日預言」已令
當地旅遊業大受打擊，據日本野村綜合研究所估算，已對日本造成5,600億日圓（約304億港元）經濟損失。事緣日本漫畫家竜樹諒喺2021年出版嘅《我所看見的未來（完全版）》提到，2025年7月5日淩晨4時18分日本南海海槽將會發生大地震，日本、台灣、菲律賓三角形海域中心將會發生海底爆炸，波及香港；但她上月指該漫畫係出版社主導，又指當日未必有事。佢喺1999年出版嘅《我所看見的未來》曾預警2011年日本311大地震，因而備受關注。
美股外幣即時報價 多國新聞任睇
香港倘地震冧樓 統保有得賠
無大地震，唔代表無地震。其實日本鹿兒島縣吐噶喇列島近來地震頻繁，兩周錄得近1,300次震度1級以上地震，而且強度同頻率有增加趨勢，7月3日錄得5.5級地震，7月5日亦錄得5.4級地震。由於7月5日時間敏感，日本氣象廳隨即開記者會澄清純屬巧合，重申現有科學無法準確預測地震時間、地點、規模，日本本來就隨時會發生地震，一般每年逾2,000次，高峰時如2016年甚至逾6,500次，如果有人不斷預言，總會言中。不過，網民仍有戒心，有網民指：「書中預言的是7月份，不是7月5日，7月5日是出版社自己寫的具體日期，所以日本末日預言時間是整個7月。」
對香港人嚟講，如果相信上述預言，就唔只係有無得去日本玩咁簡單（據彭博社引用旅遊數據公司ForwardKeys嘅數據分析，6月底至7月初，包括7月5日在內嘅一周，香港飛往日本機票預訂量按年大跌83%），更甚嘅係，預言指會波及香港，即係留喺香港都有危險。地震冧樓點算？私人屋苑通常都有提供統保保險，保險費已計入管理費，保障涵蓋火警、水浸、颱風、地震等天災引致嘅重建費用；單幢樓未必有統保，業主需要自行購買火險。屋內個人財物，則可購買家居保險。至於條命，就關人壽保險、意外保險事。
友邦遭大手沽貨 傳賣家為KIA
講到保險，保險股上周五有兩件事值得留意：①友邦（1299.HK）遭股東大手沽貨；②富衛（1828.HK）上市前暗盤破底。
先講友邦，該股上周五開市前錄得4宗大手交易，涉及3.944億股，佔總股本3.7%，涉資268億元。據彭博社爆料，科威特投資局（KIA）為賣家，由摩根士丹利安排。友邦配售價每股68元，較上周四收市價折讓6%；該股上周五收報69.15元，跌4.4%。KIA係友邦2010年IPO時嘅基礎投資者，以發行價19.68元認購3.94億股，涉資78億元，今趟清倉大賺190億元。KIA大手沽貨，有大戶接貨，未虞過慮。至於富衛，今日掛牌上市，上周五喺三大暗盤場收報36.5至36.75元，較招股價38元低3.3%至3.9%。
友邦股東散水、富衛暗盤潛水，相信同日本大地震預言無乜關係，雖然兩間人壽保險公司都係專注喺亞洲市場。友邦係港股嘅藍籌股，富衛係李澤楷嘅盈科拓展旗下嘅人壽保險公司，如果要二揀一投資，筆者會揀友邦，皆因投資講回報，收息係王道！富衛喺招股書表明：「本公司過去並無向其股東宣派或派發任何股息或其他分派，且現時亦無在可預見將來就其普通股宣派或派付任何股息的計劃。」我所看見的未來，就係無息收囉！相對友邦則持續增加派息，單睇過去5年，就分別增加6.9%、7.9%、5.3%、5%、8.8%。
割柑人
本欄隔周一刊出
操盤手札記 - 割柑人 舊文
本文作轉載及備份之用 來源 source: http://hk.finance.yahoo.com
