操盤手劄記│北水南下破頂 掃貨名單要睇（割柑人）
操盤手劄記│北水南下破頂 掃貨名單要睇（割柑人）
滔滔北水，源源供水！筆者講緊嘅，唔係香港公務員轉飲北水（港島、新界政府辦公室轉訂內地品牌
蒸餾水）單嘢，雖然呢單都好juicy，峰迴路轉，物流署周末公布，未能信納港島供應商可履約，即日暫停其供水合約。筆者講嘅，係金融市場上嘅北水——內地投資者通過「港股通」南下買賣港股嘅資金。上周五「港股通」錄得北水淨流入358.76億元，係自2014年11月17日「港股通」開通以嚟最大單日淨流入，亦係今年第三度刷新紀錄（對上係4月9日嘅355.86億元）。
下載Yahoo財經APP
美股外幣即時報價 多國新聞任睇
北水撈底 單日359億淨流入
北水對港股嘅影響，近年越發明顯。美國4月頭向全球發動關稅戰，恒指自4月9日低位19260反覆升至上周四高位25766，累升6,506點，惟高位見回吐，連跌兩日，上周五收25270，跌0.98%，兩日累跌1.34%，幅度唔算大。港股大漲小回，北水功不可沒。北水今年迄今淨流入9,389.21億元，創年度新高，超過去年全年淨流入嘅8,078.69億元；恒指期內升近26%，八成交易日錄得北水淨流入。滙豐投資管理預計，今年埋單，北水淨流入有機達1,800億美元（1.4萬億港元），相當於去年流入美股嘅外國資金嘅一半；中銀國際則預計，有機達1.2萬億元。
港股連跌兩日，即見北水趁跌市撈貨。上周四、五，港股成交分別為2,701億元、3,127億元，北水成交分別為1,475億元、1,796億元，所佔比重分別為54.6%、57.4%。當中，上周五港股雖然裂口低開，但全日計，北水買入成交為1,077.49億元，賣出成交為718.73億元，淨流入358.76億元破紀錄，撈貨手影顯現。上周五破嘅北水淨流入紀錄係4月9日嘅355.86億元，當日恒指喺關稅戰開打後低見19260，但撈底盤湧現，4個交易日後高見21603，累升2,343點或12.17%，當日撈底嘅北水，今趟食過返尋味唔奇。
AH股溢價 摩通料兩年消失
北水持續流入，帶動香港H股估值上升，而反映中國A股相對香港H股溢價幅度嘅「恒生滬深港通AH股溢價指數」，上周五跌至122.59，係2019年5月以嚟低位，代表該指數內嘅A股平均較H股有22.59%溢價。該指數今年以嚟累跌15.51%，意味A股相對H股溢價收窄。摩根大通預計，AH股溢價將繼續收窄，甚至有機喺明年至後年「平價」，皆因：①北水加碼H股——H股相對A股有折價，而且H股股息率高過A股；②盈利預測上調——當A股盈利預測上調，投資者會轉買H股，因H股有折價；③市場結構差異——A股散戶為主，H股大戶為主，交易較理性。
呢排北水有咩愛股？據Wind數據顯示，近月金融、信息技術、醫療保健板塊成為北水掃貨之選，但可選消費板塊則成為沽貨之選。而據中銀國際報告，今年以嚟（截至8月6日），北水活躍交易股份名單中，淨買入超過100億元嘅有7隻，依次為：阿里巴巴（9988）、美團（3690）、建行（939）、中移動（941）、中芯（981）、騰訊（700）、快手（1024），淨買入金額分別為859億元、474億元、324億元、231億元、227億元、154億元、107億元。想食北水條水，可作參考。
割柑人
www.fb.com/hkstockpicker
本欄隔周一刊出
操盤手札記 - 割柑人 舊文
本文作轉載及備份之用 來源 source: http://hk.finance.yahoo.com
