中環在線：CNBC女主播撇黑莓嗒蘋果 - 李華華
黑莓黑鬥黑主播輪後唔夾
好多財金界朋友都鍾意用黑莓手機(BlackBerry)，貪佢個QWERTY鍵盤夠方便嘛。不過，近年多款智能手機興起，越嚟越多人脫離黑莓行列，連長期用家、財經網站CNBC著名女主播Maria Bartiromo都轉用iPhone，唔通黑莓真係玩完？
Maria不嬲都係黑莓手機嘅粉絲，但上個禮拜五佢喺節目入面呻，話自己部黑莓過去兩個禮拜出咗問題，最後終於換咗部iPhone。
你可能會問：女主播用乜款手機關我乜事？係咁嘅，Maria喺06年曾經引述聯儲局主席伯南克一句無心之失嘅說話，令市場以為儲局會繼續加息，個市跟住就大跌，搞到伯老要認錯，話以後唔敢亂講嘢，Maria亦因此聲名大噪。所以咁出名嘅主播話畀觀眾知佢用乜嘢手機，仲唔係最好嘅免費廣告？佢棄用黑莓，黑莓手機製造商RIM上周五股價即跌咗2%，仲俾財經網站24/7 Wall St評為「2013年消失品牌」之一，前途勁灰！
至於昔日香港女主播、轉戰輪場嘅「小飛俠」林燕玲同「珠珠」趙海珠，話未試過用BlackBerry，佢哋覺得iPhone睇電郵同回覆都好方便。
iBanker愛iPhone
香港以前都勁多iBanker用BlackBerry，不過家統統移情別戀。金利豐研究部執董黃德幾覺得BlackBerry不及iPhone咁user-friendly，「我唔係好習慣用手指公嚟控制鍵盤，發電郵亦都唔係我部電話最主要用途，所以只係用咗BlackBerry幾個月。」
李華華
mailto:LiWaWa@AppleDaily.com
上一則: 華為否認補貼搶客
下一則: 中環在線：萬國花牌惹遐想 - 李華華
中環在線 - 李華華 舊文
