金融High Tea——國產定心丸
2012年6月26日
昨日主要係北方吹淡風，內地上證綜指跌1.6%，收2224點，下晝係咁拉住港股回落，最後恒指收18897點，跌97點，跌幅0.5%，叫做跌得少過內地啦。大市成交繼續靜似鬼，只有375億元。
內地股市跌浪由經濟前景憂慮引發，早前大家爭入市阿爺出招經濟見底，炒完一輪後經濟數據未見好轉，到上周四A股開始大跌，主要誘因是匯豐公佈6月中國採購經堙指數(PMI)初值為48.1，創7個月新低，令市場以為中國經濟在上半年見底的預期再度動搖。
煤價暴跌拖低A股
內地煤價大跌令人毛骨悚然，中國煤炭使用量佔能源使用的比例大約80%，煤價反映經濟需求，近日渤海動力煤價跳崖式暴跌，動力煤價指數在6月初仍橫行，但近日崩盤急跌6%，令煤炭股大幅下滑，拖低指數，煤價跌利好電力股，搞到電力股升完再升。
港股成交已經連續幾日萎縮，反映投資者已經輸到怕怕，變晒塘邊鶴。如今再加多一劑內地股市下插，更令人心寒，呢啲時候最好食啲國產定心丸。
中國國際金融董事總經理兼研究部聯席負責人黃海洲表示，第三季內地政策將放鬆，外圍情況比較平靜，為A、H股創造較佳的反彈環境，A、H股反彈空間有15%，預料恒生國企指數將最高反彈16%至11000點，上證A股可以高見2500至2600點。不過，黃海洲指出，歐美負面因素第四季會再度重現，A、H股將會回落。
佢建議投資者增持內需周期性板牌，包括水泥、機械相關股，汽車、家電消費相關股，以及保險、證券、內房股等。另外，他建議減持油氣、煤炭、電訊和日常消費等股份。
同屬中金的首席經濟學家彭文生就估，預料內地第二季經濟增長只7.3%，為全年谷底(要下月初才公布)，而6月通脹料2.3%，7、8月進一步放慢至2%以下，為內地放鬆政策留出空間，最快於8月減息，至於第四季會否減息，視乎經濟情況，他預料年內將有兩至三次降低存款準備金率。
中金是內地大行，睇怕睇嘢都有啲譜啩，中金估到第三季炒起15％咁具體，唔信都要睇睇。不過同樣來自內地的摩根大通董事總經理李晶就無睇得咁樂觀話，港股一直受到環球和內地市場影響，現股值很吸引，但投資者很審慎，情願投資海外市場買債券，預料港股今年底復甦的機會不大。
港股ETF預影響微
畀李晶講中就大劑啦，即係一直衰到尾。不過如果大陸8月再減息，美國又QE3的話，斷估無痛苦，第三季點都炒一炒啩。
發改委前些時話配合胡總訪港慶祝回歸十五周年，中央會送大禮，究竟中央的大禮包有乜好料，消息滿天飛。一個市場的焦點係中央會加快將前海打造成中港兩地金融服務合作區，藉此推進中港銀行跨境人民幣貸款業務。有傳前海上報中央的一籃子先行先試政策已經獲批，當中先行先試的措施包括稅收、金融創新、法律、人才、教育、醫療等方面，細節可能會於今個星期公佈。但我睇唔到搞前海香港有乜股票好炒。
另一個傳聞是搞變相直通車，即係港股ETF，但摩通李晶就認為，港股ETF由於數量少，只能給內地投資者接觸香港股市，對香港股市沒有太大影響咁話。
由於振英哥又話唔想放太多自由行旅客落香港炒貴啲租，唔好望再因阿爺放政策而炒零售股，咁七一有乜好炒？
陸羽仁
上一頁 下一頁
金融High Tea 舊文
