中環在線：功成身退無悔今生大家樂招牌感觸派金句 - 李華華
開始淡出嘅陳裕光逐漸交棒畀羅開光，噚日忽然感慨萬千。梁志永攝
大家樂(341)主席陳裕光都幾識得揀時間交棒！正當佢自己都預期實施最低工資後，大家樂會告別以往高增長歲月，佢就將管理權交畀大股東羅氏家族男丁羅開光，仲話可以功成身退。好彩羅開光喺大家樂都做咗30年，應該熟曬架步，識得執生，大家樂股東都唔使擔心啩。
傳媒關注當係「愛」
身為大家樂嘅「招牌」，陳裕光舊年初已經事先張揚，話夠60歲係時候退休，今年4月正式退居幕後，只做非執行主席，噚日大家樂公佈全年業績，佢就首次同新任首席執行官羅開光一齊面對傳媒，陳主席亦好識做，畀好多位羅開光表演，但都忍唔住講少少退休感受：「我管大家樂超過25年，可以話無悔今生，功成身退！」
重提舊年因為最低工資搞到一鑊粥，令到大家樂被全城圍攻，甚至有人罷食抗議，陳裕光家用好輕鬆嘅語氣話：「其實大家樂同傳媒關係一直都好好，相信大家對公司嘅關注，都係『愛之深，責之切』，我哋都好尊重同聽大家意見。」難得陳主席對外界批評睇得咁開，唔知接棒嘅羅生有冇咁嘅功力呢？
單睇羅生噚日嘅表現，就難以判斷，佢答問題時好似氣定神閒，但可能始終係第一次俾記者圍攻，大部份「答非所問」。好似有記者三番四次問佢撇除中國廠房投資，內地業務利潤實際有幾多呢？記者都係想要個數字啫，但羅生就話投資係為將來發展，咁即係點呀？華華希望羅生除咗加價加幾多，其他財務數據都要記住㗎！
李華華
mailto:LiWaWa@AppleDaily.com
上一則: 上海再出拳控樓市
下一則: 中環在線：脫盟危機渣打CEO救英揆 - 李華華
中環在線 - 李華華 舊文
